ZRA nih ‘CNF cu ralhrang asi caah NUG, ASEAN le UN sinah kan report’ ati

Zomi Revolutionary Army (ZRA) nih, “CNF/A nih Tedim pengah ralhrang tuahsernak a tuah caah NUG, ASEAN le UN sinah kan report,” tiin tuni ah cathanh a chuah.

ZRA nih, “December 15 ah, Chin National Army (CNA) ralkap pawl le a tapeh a dang hriamtlai phu 3 (an dihlak minung 50 hrawng) cu CNA ralbawi pakhat nih a hruai hna i hriamnam tling khitkhat in Tedim peng, Haimual khuate ah an lut i khuami cu ralhrang bantukin an hrocer hna,” ati.

“ZRA nan ṭanh maw? tiin khuami an hal hna hnu ah ralhrang phu pawl (CNA le a tapeh pawl) nih cun Church Pastor Laang, kum 60 le a chungkhar le chungkhat dang pakhat an tlaih hna i khuazei dek an kalpi hna. Minung fa lo bang vual dihlak in an hrem hna hnu ah an hma he inn ah an hung chiah hna. Hnu ah pastor le a chungkhar cu an tlaih kalpi ṭhan hna i atutiang an umnak kan thei kho lo.

“A thaizing December 16 zaan ah ngakchia pa te an tlaih i Ngawsing khuate luhnak phaw caah an hman. December 17 khua dei hlan ah ZRA ralkap an riahnak inn pakhat an kah. ZRA ralkap nih an kah ve hna i an ṭhawl khawh hna. Hi a chiakha tukmi CNA le a tapeh hriamtlai phu dang pawl tuahsernak ruangah inn ngeitu chungkhar minung 2 hliam hma an tuar.

“Pau Dothlennak le NUG min hmangin, hi bantuk sualnak ngei lo khuami tuksum in hrocer le hrem, ngakchia hna ralram i phaw caah hman le khuami hna tlerh hi Chin stat ah a hung tam ngai. NUG nih PDF caah zulhphung a chuahmi buar in hi bantuk sualnak chiakha cu CNA le a tapeh hriamtlai phu dang pawl nih an tuah. Hi an tuahernak cu NUG, ASEAN le UN Nuhrin Covo Bu sinah kan report hna,” ati.

A sau tuk i mah tiang lawng kan leh, Mirangca a fiangmi nih atang ZRA cathanh ah tling tein rel khawh asi.

Mah kong he pehtlai in CNF le CJDC nih mah ca kan ṭial lio tiangah zei bantuk fianternak cathanh hmanh an chuah rih lo – hitin dai tein an um thai ahcun Tedim peng mipi vialte le Chinmi dang cheukhat zong nih CNF sual ah an ruah te khawh men. NUG, ASEAN le UN zong nih CNF sual ah an ruah te khawh men, an sual lo ahcun thil sining fianternak cathanh tal cu an chuah ve awk asi.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...