A muru;
- CDF-Zophei cu Zophei chung lawng ah kan cawlcang lo
- Mindat le Matupi kar zongah ral kan do
- CNA le CDF dang pawl he kan i bawm peng
- Ral umnak paoh ah kan si khawh tawk in kan kal peng
- CJDC zongah CDF-Zophei ralkap 30 kan kal
- Ral doh lawng si loin Zophei tlang ah cozah um ti lo caah mipi caah a herhmi fimcawnnak le ngandamnak zong kan tuah
Zophei tlang ah ralhrang Myanmar ralkap sakhan pakhat te a um i cucu Vuangtu khua ah a um. Nain, CDF-Zophei an ṭih tuk hna i an zaam dih caah sakhan cu CDF-Zophei nih a lak i a duah viar cang. Zophei tlang ah ralhrang sakhan um ti lo ahcun CDF-Zophei um herh ti maw?
Mah biahalnak cu anmah CDF-Zophei hruaitu James nih fiang tukin a leh.
“Zophei ah ralkap sakhan um ti lo nain, CDF-Zophei hi ral a umnak paoh ah kan si khawh tawk in kan kal i CDF dang pawl kan bawmh peng hna.
“Vuangtu ralkap sakhan um lio zongah, CDF-Zophei cu Hakha le Thantlang kar ah CDF dang he i bawm in ral kan do.
“Vuangtu ralkap sakhan cu 2021 September 30 ah ralkap nih an zaamtak i CDF-Zophei nih kan lak.
“Mah hnu zongah, Zophei lawng si loin Mindat le Matupi kar kahdohnak ah CDF-Zophei ralkap pawl kan i thawh ve i CDF dang pawl kan va bawmh ve hna. Cun;
- CDF-Hakha
- CDF-Thantlang
- CDF-Lautu
- CDF-Mara
- CDF-Zotung, tbk CDF dang pawl he thawngpang lei in siseh, hriamnam le ralkap lei zongin kan i bawm peng. Kan si khawh tawk in ral umnak paoh ah kan kal peng.
“CDF-Zophei cu tinṭan a kan petu CNA/F he zong ṭha tein pehtlaihnak kan ngei. Chinland Joint Defense Force (CJDC) zongah chungtel kan si i CJDC nih khua a khan ning paoh in rian kan ṭuan chih fawn.
“Atu zong hi CJDC ah CDF-Zophei ralkap 30 hrawng kan thlah hna.
“CDF-Zophei hi CNA sinah tinṭan kai kan i thokka ahcun 300 hrawng lawng kan si nain atu cun 1,300 leng kan si cang.
“Ralkap uknak kan duh lo i ralkap cozah kan cohlan lo caah cozah kan ngei ti lo. Mipi caah a herhmi ngandamnak, fimcawnnak, tbk vialte cozah lei in zeihmanh a rat ti lo caah kanmah tein i hruai le zohkhenh kan hau cang.
“Cucaah, CDF-Zophei nihhin ral doh lawng si loin;
- Mipi Ukhruainak Department (Zophei tlang khua 22)
- Fimcawnnak/Sianginn kainak (Zophei tlang khua 22)
- Ngandamnak, tbk in Department 7 kan ngei i kan mipi caah a herh ningin rian tampi kan ṭuan, cucaah budget zong a dih taktak,” tiah a chim.
CDF-Zophei nih tangka ting thong 1 leng in Zophei khua 22 ah sianginn a on
CDF-Zophei caah Malaysia um Zophei tefa nih RM113,000 leng (Kawlram ting 500 leng) an thawh
CDF-Zophei caah ramkip um Zophei tefa nih ting thong 17 (1.7 billion kyats) leng an thawh
CDF-Zophei cu CNF hruainak in kan cawlcang lai
Ral thawngpang: CDF-Hakha le CDF-Zophei nih Kawl Ralkap 3 an thah hna
