Zei ruangah dah Pu Thla Hre pension lak a cut lo buin a lak hnga

Zei ruangah dah Pu Thla Hre pension lak a cut lo buin a lak hnga

Zapi aw – Hi ka ttial lai tikah zeiruangah a la tiin a phi chuahpi ka tim lo. Asinain bia ka theihmi le thil ka hmuhmi pawl fonhtonh in ka purhdahmi ka langhter lai i zeiruang ah dah a si ti cu careltu nih mah tein a phi i chuah cio si te ko seh.

A cung nan hnuhmi inn raangpi hmanthlak hi naite ah Sipin ramkulh lutlai in rian aa dinmi Pu Thla Hre nih aa dinh hlan ah a sakmi a inn raangpi si. (Halkha White House tiah min ka bunh)

Hakha inn ah mah khi nakin tangka a dih deuh dingmi pumpak inn a um theng lai ka zum lo (ka palh kho). Aa dawh bik a si ti tu cu a hmu balmi paoh nih nan hngalh cio ko lai. Pu Thla Hre cu sipin rian ah Director dirhmun in kum nga tluk fang lawng rian a tlai rihmi a si. Cu hlan cu cozah riantuan thlahlawh a rak niam tuk kha mu.

Director a si nak a sau lo. Cozah riantuan thlahlawh tein mah tluk inn ttha sak khi nan khuaruah a har cio lo maw?

A fapa Thang Thang (awtha pa) caah Land Cruisher Motor nak pi tilawng cung in vun tthumh bak mi a cawkpiak mi kha a tlawmbak sing 500 in 1000 kar man a si ti si.

Pu Thla Hre a nupi cu siang cachim rian a ttuanmi a si. Sipuazi tuahmi a si ve lo. A fanu upabik Ven Ven zong pasal a ngei cang i an dirhmun hngalh an si ve ko. A fanu hniang Mawite zong CHRO ah rian a tuanmi a si i naite ah pasal a ngei ve. Chim duhmi cu an chungkhar ah business nganpi a tuahmi pakhat hmanh an um lo.

Pu Thla Hre, Halkha ah a kong ceih a ton hmasabik hrawnghrang a si rua tiah ka ruahmi cu 2015 Kokek Harnak puicimh kan ton lio ah CBCUSA nih Hakha Rescue Committee (HRC) chungin pakhat rak kan tlawng uh ti a rak si.

Cu lio ah HRC zong ah biatak tein a herhmi a bawm i Hakha City Master Planning Committee (HCMPC) timi dirh in Hakha remh tthan nak ah a cawlcaang bik ko rua timi Pu Thla Hre cu kalter a rak si.

CBCUSA nih tangka zeizat an ronh timi fiang in kaa cinken ti lo. Asinain HRC ah pakhat hmanh a ap lo. HCMPC caah laptop te hna an cawk, zung riantuantu te hna an lak. Luti hor hlainak ttheng hme tete pahnih a cawk i HRC nih tlaih loin HCMPC nih an tlaih.

A hnu ah CBCUSA in mino upa pakhat rinhchanh ngaimi a hung tlun hnu lawngah Pu Thla Hre sinah an pekmi bawmhnak tangka vialte HRC kut ah a luh lo kha fiang in hun hngalh a si.

Falam dinti peknak ding caah sing 5000 leng budget a tla. Nihin tiang zeihmanh tlamtling in a tawlrel khawh lo caah Chief Minister a lung tling lo ngai kho men.

Chief Minister nih amah duhmi midang Director rian pek a duh hna caah Pu Thla Hre Department kherhlainak a tuahnak a si a timi zong an um ve.

Hakha ah dawrkhan man he tuak in sing 8000 tluk dih in sak timhmi Hakha Myoma Market innpi zong nihin tiang foundation hmanh an lim lo. A kum leng a rau cang. Market tisik anhnah zuar vialte Kio Mang celtual ah thlawk le ceet lak ah an chiah hna. Mizapi zeitluk in dah harnak kan ton.

Hakha Market Dawr Khan Pawl Sing 35 le 110 Kar In Cawk Khawh An Si Lai
Hakha Market – 2017 ah lim ding an rak timi nihin tiang foundation hmanh lim loin aa taap, ka hmet law relchap

Cucaah a cheu nih cun amah ttuanvo lak awk a simi chungin Falam ti peknak le Halkha Market saknak a lim khawh lomi ruangah a rian in aa dinhnak hi a si ttheo lai tiah a ruatmi an tampi.

Halkha thar caah thlanhmun thar an zoh, budget a tlak hlan in amah nawl in lam a cawh i lung a phahmi te hna zong eihmuarnak aa tel lo tiah ruah awk a har ngai.

Halkhua khuanu khuapa nih Ruavazung ah Bus Terminal saknak hmun ttha taktak an sawh peng ko buin a al hna i Kankaw lam kam hmun bi cerek ah bus terminal cu a tuah. Hakha ah terminal pahnih pathum zong kan ngeih a herh a ti. Halkha khua chung motor lutchuak caah Bus Terminal pahnih thum kan herh lo cu nan hngalh cio ko lai. Eihmuarnak aa tel khomi thil sining a si.

Ruavazung khi rak ti hna sehlaw mirum pawl share pek dingin sakter hna seh, a herhmi Ware House, restaurant le Hotel tiang aa tlum dih dingmi hmunpi a si.

Pu Thla Hre cu Naypyidaw nih an auh i cunglei nawlngei upa nih zeizat set dik an liamter lai. Liamter mi tlawmpal cu um dawh hrimhrim a si.

Pek awk rua kan peh than te lai.

Cattialtu: Salai Tikhing

Theihternak: “Zapi aw” tiin kan post mi cu cattialtu pumpak nih an ruahning an ttialmi a si, The Chin Express nih a sullam thlenmi um lo. Ahopaoh nih zalong tein The Chin Express ah nan ruahning ttial khawh cio a si.

Email: lian@thechinexpress.com

Leave a Reply

Your email address will not be published. Required fields are marked *