Wednesday, December 1, 2021

Yangon: SAC nih mei man a pe lomi inn pawl mei a phih hna

Yangon ramṭhen, South Okkalapa peng, Sang 7nk ah ah mei man a pe lomi inn pawl cu SAC Mei Zung rianṭuan pawl nih tuni ah mei hri an hung phoihpiak hna. Inn a zaza mei phihpiak kan tong, tiah a hmun ummi nih an chim.

“Zingka ah South Okkalapa Sang 7nk ah mei an hung phih. EPC minung pawl nih an hung phih. Kan phih rih lomi inn pawl zong mei man an pek lo ahcun kan phih dih hna lai. Mei man kan pek ko lai a timi zong an pek lo ahcun thaizing ah kan ra lai mei kan phihpiak hna lai an kan ti,” tiah Sang 7nk ummi pakhat nih a chim.

Mei an phihpiak hna lio ahcun ralkap an i tel lo. SAC Mei Zung rianṭuan 20 hrawng an si.

Mei a hung phittu pawl nih ‘South Okkalapa Mei Zung (EPC) kan si lo, North Dagon Mei Zung kan si’ an ti, tiah sangmi nih an chim.

Hitin mei an phihpiak hna caah sangmi cheukhat cu mei man an liam colh.

“Hitin mei an kan phihpiak tikah meh chuan, ti hman, phone battery tun, tbk a ngah ti lo. Inn cheukhat cu an ṭih tuk hna i mei man an pek colh,” tiah sangmi pakhat nih a chim.

“Inn cheukhat cu mei phih cu chim lo, an kan thah hmanh ah mei man kan pe lai lo a timi zong an um. Rammi vialte lungrual tein kan ṭanṭi ahcun zei bantuk harnak a kan pek zongah kan pah khawh ko lai. Khat le khat i dirkamh usih law teirial peng ko usih,” tiah sangmi ramkeltu pakhat nih a chim.

Kawl Ralkap nih uknak a fir hnu in mifir cozah tangka ngei hlah seh tiin mipi nih thla fatin mei man liam ding liam ti loin CDM an tuah cio.

SAC nih “Mei man pe uh, a pe lomi mei kan in phihpiak hna lai…” tiin Yangon sang tampi ah thawng an thanh hnu ah sang tampi ah mei an phihpiak thluahmah hna.

Chin khualipi Hakha zongah mipi nih mei man an pek lonak a sau ngai cang. Atutiang ahcun mei phihpiak ngaingai a tongmi an um rih lo.

- Advertisement -