Ralkap nih Myanmar ram a luhtermi CNN thawngla nu Clarissa Ward nih Myanmar kong a chim ve cang.
Clarissa Ward nih, “Ralkap nih uknak a chuh hnu in ramdang thawngla hohmanh Myanmar ram a luhter hna lo. Kanmah lawng luhnak nawl a kan pek.
“Yangon kan phak ah hotel ah i ṭhumh kan duh nain ralkap nih a kan sian lo. An kulh dihmi ralkap sakhan ah a kan umter. Kanmah tein leng kan chuak kho lo.
“A ni 1nk cu ralkap mawṭaw 6 khat in ralkap nih a kan zulh i Yangon khuachung ah a kan kalpi. Mah pinah, kan tuahmi paoh a zohfel dih cikcekmi kanmah zohtu pawl an thlah rih hna.
“Mipi umnak hmun ah a kan kalpi huaha lo. A kan kalpi paoh ahcun kan tuahmi paoh kha a kan zultu ralkap pawl nih an phone in video an thlak i an i chingchiah dih. Bia kan halmi minung vialte zong ralkap nih an phone in video an thlak hna i an min an lak dih, an i chingchiah dih hna. Mah ruang cun zalong tein thawngpang dik lak a har ngai.
“Voi 1 te mipi umnak market ah a kan kalpi. Kan camera kan chuah i video kan thlak cangka in mipi nih a kan fuh i ralkap duhlo langhternak an kut zung 3 an piah. Cun, anmah lei thil sining a kan chimh. Kan thinphang tuk an ti. Daihnak um lo. Anmah lei thil sining chimnak caanṭha kan pek hna i kan chimter hna.
“Nain, bia an chim dih cangka in ralkap nih an tlaih hna. Market chung kan um rih lio ah minu pakhat nih a hung ka tlik hnawh i ‘tunai nan sinah bia a chimmi minung 3 an tlaih hna’ tiah aa ka chimh, amah cu a tha zong ther dih.
“Sinain, CNN sin biachim ruangah ralkap nih an tlaihmi minunng 11 lakah 8 cu an thlah cang hna. Mah nih hin, mipi zei tluk in dah an him lo ti a langhter. An thinphan tukmi, democracy an duhmi le hmailei khuasaktintuknak ṭha deuh an duhmi kong hmanh camera ah an chim kho lo. Mah tluk tiang cun ralkap nih an tlerh hna.
“Ralkap nih Myanmar ram ah CNN luhnak nawl a kan peknak aruang cu anmah ralkap lei thil sining kha vawleipi sinah chim an duh caah si. Chimnak caanṭha zong cu kan pek hna.
“Ralkap nih cun mipi sandahpiahnak hi ṭihnungmi buainak le sipuaizi hrawktu asi tiin an ruah. Mipi hi dai tein an um ahcun a ra laimi kum 2 chungah thimnak kan tuah ṭhan ko lai an ti.
“Mah pawl hi sandahpiahtu pawl nih an tlerhmi hna an si tiin kan hmai ah minung tampi an ṭansi ter hna i sandahpiahtu pawl nih an tlerh hna nak kong cu an kan chimh.
“Inn a rawkmi pawl a kan zohpi i ‘mah hi sandahpiahtu pawl nih an hrawhmi si’ an kan ti.
“Tu hnu kum 2 chungah thimnak kan tuah lai an timi zong mipi nih an zumh hna lonak aruang cu, liamcia November thla zongah zalong tein thimnak an tuah cang i thimnak zohfeltu ramdangmi zong an ra i mee diklo a um lo an ti dih cang. Mah buin ralkap nih uknak an chuh hna. Mah ruangah ralkap nih thimnak kan tuah lai an timi hi mipi nih an zum hna lo.
“Cun, kum 50 leng chung ralkap hremuknak tangah an um cang caah atu cu mipi nih mah uknak ah kir ṭhan an duh ti lo. Ralkap doh hi a sungkhan an duh ti lo. Liamcia kum 10 chungah zalonnak an hmuhmi sungh ṭhan ding an ruat kho ti lo.
“Hika kan phak tikah kan hmuhmi cu ralkap nih ṭanhtu mipi an ngei lo. An ngeihmi cu hriamnam le ralkap thazaang tampi le tangka lawng asi. Sandahpiahtu pawl hriamnam le tangka thazaang he cun tahchun awktlak hmanh an si lo. Tu hnu kum 2 zongah hriamnam le ralkap thazaang a ngeimi ralkap sinah uknak cu a taang rihte ko men lai.
“Hiti ning cun Myanmar ram ah tuksapur thahnawnnak a chuak lai a titu UN le mi vialte nih an thinphan ciomi cu, sandahpiahtu pawl an buai deuh le hriamnam an hman deuh ahcun ramchung ralpi taktak a tho lai ti hi si. Mah dirhmun an phak ding cu hohmanh nih an duhpiak hna lo,” ati.
Atang video ah tling tein zoh khawh asi.
Ralkap nih CNN Kawlram a luhternak aruang cu – Ralkap nih ramdang media, US, UN le vawleipi sinah ralkap ṭhatnak chimpiak dingin lobbyist a hlanmi Israel pa Ari Ben Menashe nih “keimah tawlrelmi asi” tiah a chim.
