21.5 C
Hakha
Monday, February 24, 2020
More

    World Bank tangka cawimi $100 million cu Chin state peng 4 sianginn zongah an hman ve lai

    Follow Us

    99,980FansLike
    441SubscribersSubscribe

    Ṭial Tharmi

    - Advertisement -

    September 17 ah tuahmi Rampumpi Hluttaw meeting ah ‘mikip caah thil ṭha a chuahpi ding quality ṭha fimcawnnak tuahnak caah World Bank sinah US dollar 100 million kan cawi lai’ tiah an ceih.

    World Bank tangum Ramkip Ṭhanchonak Bu (IDA) sinah cawi ding $100 million cu Chin state peng 4 telh in Kawlram chung peng 115 fimcawn remhnak caah an hman lai.

    Chin state ahcun; Paletwa peng, Kanpetlet peng, Mindat le Thantlang peng i cozah sianginn fimcawn ṭhat ternak caah an hman lai.

    World Bank nih tangka a kan cawih hnu ah pengkip ah zeizat cio dah hman asi lai, ti cu tuaktan ṭhan asi lai.

    Paletwa peng MP Salai Myo Hteik nih, “fimcawnnak remh a herh taktaknak peng an thim hna caah santlai tuk lai tiah ka ruah. Ṭuanvo ngeitu zung nih ṭha tein a tawlrel i basic schools pawl zong nih ṭha tein an hman ve ahcun tampi theipar ṭha a chuak ko lai,” tiah a chim.

    “Kanmah Paletwa peng hoi hna cu, Taang 10 awng an tlawm biknak zong asi caah mah hi a herh taktakmi si,” tiah a chimchap.

    Fimcawnnak Vuanci Myo Thein Gyi nih, “tangka kan cawi hnawhchan cu, ngakchia hna hi quality ngei fimnak cawng kho hna sehlaw, sianginn kai ding kumkhua si nain a kai lomi pawl zong hi fimcawnnak tuahpiak hna usih, cun sianginn rianṭuannak caah tangka chanbau hlah usih ti kan duh caah si,” tiah a chim.

    “Sianginn ai phuakmi ngakchia zor deuh hna seh, cun sianginn a kai lomi ngakchia 77,000 hi fimcawnnak tuahpiak kho hna usih, ti kan duh.

    “Tangka cu kum 30 chung kan i cawi lai. Kum 5 chung a ṭu um lai lo. Mah hnu ah kum fatin a ṭu 3.3% asi lai. Kum 25 chungah duhsah tein kan cham lai,” tiah vuanci nih a chimchap. — Chin World le Xinhua

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.