15.6 C
Hakha
Sunday, June 20, 2021
- Advertisement -

Ṭial Tharmi

VIDEO: Laipa 2 cu Malaysia Rammi nih Fak Taktakin an Velh Hna

Chin pa 2 cu Pudu Plaza pawngah Malaysia rammi India pa pathum nih fak taktak in an velh hna. An lungfim huaha lo tiangin an lu ah saikal luchin in voi tampi an tuk hna.

Mah kong he pehtlai in The Chin Express nih Chin Refugee Committee (CRC) rianṭuan Saya Pakulh kan chawnh i, ” August 23 zaan 11:30pm ah an velh hna hi si,” tiah a chim.

“Velh tong Chinmi 2 cu Thantlang peng an si. Anmah nawl peknak tel lo cun an khua le min cu chim awk ṭha lai lo.

“Thil sining cu, Pudu Plaza pawng um KK dawr cung dot 3nak ah a ummi Kawl dawr ah Laipa 2 cu an ṭhu. An pawngah a ummi phone a ra i ‘boss’ tiin a cuan caah Laipa pakhat nih ka hawipa a boss nih a chawnh tiin a ruah caah phone cu a lak i a hawipa a pek.

“A hawipa nih ka phone asi lo ati i a chiah ṭhan ko nain phone ngeitu Rakhine pa nih ka phone fir nan timh tiin a hro hna. Fir kan tim lo tiin an chimh len nain kan hmuh ko hna cuta tiin a al peng hna i an buai hrulh.

Malaysia ah Rakhine nih Chin tlangval an Thah – hmet law relchap

“Phone ngeitu Rakhine pa hi Kawl dawr ngeitu asi. Malaysia rammi India pawl a chawnh hna i cutin India pa 3 a velhter hna hi si.

Palek nih an Bawmh Hna

“Pawngkam ummi nih palek an chawnh hna i pawngkam a vehvattu palek pa a rung phan nain zeitin hmanh a ti hna lo. Palek pa hi India asi ve.

“Laipa 2 cu India pawl hi tangka RM50 cio pe hna ulaw va ṭin uh ati hna. Laipa nih tangka kan ngei lo an ti i deilei 3:30am hrawngah inn ah an ṭin.

“An velh hna lio kha pawngkam mi nih Facebook ah video an rak tar caah Malaysia media pawl nih an hmuh i news ah an ṭial i palek an chawnh hna tikah Kuala Lumpur palek sakhan lubik asi vemi Dang Wangi nih a thar in hlathlainak a tuah ṭhan.

“A hmun a rak phanmi India palek pa nih cun ‘velh tongmi 2 cu sizung ah kan kalpi hna’ tiin a lih hrokhrawl in cunglei ah a rak chim i media sin zongah palek nih cutin an chim. Sizung ah an kalpi hna lo.

“A thaizing kiptuh ah palek nih phone an ka chawnh i hlathlai kan i bawm lai an ti caah CRC EC zong bawmh ka hal hna i ka hlat hnu ceo ah Laimi an si hi kan hngalh.

UNHCR aa Thlak

“Palek nih UNHCR sinah na minung an si maw tiah an rak hal ve. UNHCR nih CRC Coordinator phone a chawnh chin i CRC minung an si maw tiin a rak hal ve.

CRC nih Palek Sakhan ah a Report Piak Hna

“August 26 ah Laimi 2 cu CRC zungah ka auh hna i palek zong cu ka auh ve hna.

“Mah hnu cun palek sakhan ah kan kal hna i Laimi 2 nih thil sining an chimmi cu palek nih record an lak. Palek nih sizung ah va kal ulaw nan hma kong vialte kha doctor’s memo va la uh a kan ti.

“Sizung ah Laimi 2 cu ka piah hna i sibawi memo cu kan lak hnu ah palek sakhan ah report ka tuah ṭhan.

Palek nih Minung 4 an Tlaih Hna

“Laimi 2 a veltu Rakhine pa 2 le India pa 2 cu palek nih an tlaih hna. Hriamnam in mi fahnak a petu dantatnak Sualman Upadi Dal 324 in tazacuai an si lai.

“Laimi cu zei tik dah biaceihzung ah an auhte hna lai ti a um rih lo. Tlaihmi 4 kong an ceih tikah Laimi 2 zong cu auh an si ve te lai. Atutiang cu biaceihzung kai nithla a um rih lo,” tiah CRC rianṭuan Saya Pakulh nih The Chin Express ah a chim.

Laimi 2 cu an velh hna ning a fak taktak nain Pathian dawtnak thawngin hma fakpi an tong hraw lo, ati.

Atangah an velh hna lio VIDEO zoh khawh asi.

- Advertisement -

Ṭial Tharmi

World Cup luhnak puai Myanmar goal bawhtu Pyae Lyan Aung cu Japan ah refugee a sok

Kum 2022 ah Qatar ram ah tuah ding FIFA World Cup ah i tel khawhnak puai round 2nk cu Japan ram ah an tuah....

Rev Dr Dennis Shu Maung: Ramthumnak phan Chinmi nih Kawlram um Chinmi chanh hna usih

Australia Chin khrihfabu funtomnak bu Chin Christian Council in Australia (CCCA) hruaitu Rev Dr Dennis Shu Maung nih, "Ramthumnak phan Chinmi hna hi atu...

Myanmar ralkap nih ‘innpa ram pawl nih kan cohlang hna seh’ tiin kan ram chuak a zuarh hna

February 1 ah Myanmar ralkap nih mipi thimmi cozah uknak a chuh thokin rampumpi ah mipi nih duhlonak an langhter i cozah rianṭuan pawl...
- Advertisement -

Malaysia PM: Ni fatin mizaw 4,000 tang an si tikah lockdown kan dorh lai

Ni fatin COVID-19 mizaw 4,000 tang an si tikah full lockdown kan dorh lai, tiah Malaysia ram hruaitu Rampumpi Vuancichoh Pu Muhyiddin Yassin (hmanthlak)...

Nupi 39 ngeimi Pu Ziona a nunnak liam

Nupi 39 le fa le tufa 127 a ngeimi Pu Ziona Chana, kum 76 cu Mizoram ah a nunnak liam, tiah Mizoram cozah nih...

Subscribe to Youtube

The Chin Express cu kan Chin mipi caah free tein ni fatin thawngpang dik thanh aa zuam pengmi kan si. Kan video hmuh na duh ahcun kan Youtube channel ah 'Subscribe' tuah ve.

- Advertisement -
- Advertisement -