24.4 C
Hakha
Saturday, February 29, 2020
More

    VIDEO Interview – UN holhlet Salai Eric Cenhrang nih a chimmi chungah a biapi khunmi cheukhat

    Follow Us

    99,932FansLike
    441SubscribersSubscribe

    Ṭial Tharmi

    - Advertisement -

    UNHCR Malaysia zung um IOM department ah kum 7 chung holhlet a ṭuan liomi Salai Eric Cenhrang he tonbiaruahnak kan ngei kho. Atangbik ah VIDEO tling tein zoh khawh asi.

    A chimmi an biapi taktak hna, mah chungin ka siaherh khunmi tete atanglei ah ka vun langhter.

    International Organisation for Migration (IOM) cu UNHCR Malaysia zungah a um vemi asi i ramthumnak kal ding refugee vialte a bawmtu bu asi. IOM cu phu 3;

    • Operation (Kal ni thanhtu le kalnak bawmtu),
    • Medical (A kal lai ngandamnak zohtu, thi sitnak) le
    • AusCO (Australia kal lai nunphung cawnnak) tiin kan i ṭhen.

    January thla chung ramthumnak kal ding cazin ah Chinmi 100 leng an i tel. Tedim deuh lawngte an si i Laimi cu an tlawm deuh ngai. February thla chung a kal ding cazin cu a chuak rih lo nain Chinmi 100 hrawng an si rihte ko lai tiah ka zumh.

    US, Australia, tbk., ramthumnak um nih auhmi an nupi le va hi visa an ngah tikah anmah tein vanlawng ticket cawk khawh asi nain cawk hlan ah IOM ah ra hna sehlaw ‘Malaysia in chuahnak nawl (exit permit)’ ka lakpiak tiin bawmh rak hal hmasa hna seh.

    Visa ngeih zongah exit permit ngeih lo ahcun Malaysia in chuah khawh asi lo caah Chinmi tampi vanlawng ticket man an sung cang.

    Keimah hi 2013 in IOM ah ka ṭuan i mah hnu cun UNHCR Malaysia in Chinmi 40,000 hrawng US an phan cang men lai tiah ka zumh. Australia, Canada, New Zealand, tbk., pawl zongah a kalmi an um ve nain an tam tuk lo. Ka ṭuan hlan ah zeizat hrawng dah an kal ti cu ka hngal lo.

    Australia lawng si loin US, Canada, Norway, Denmark, New Zealand, tbk., ummi nih nan nulepa le fale lak khawh an si, nain sihni hlan lo mah tein laknak tuah cu a rau tuk. Kum 4 tiangah aa la kho rih lomi zong an tampi. Sihni a hlangmi cu rau lo te ah an kal peng ko.

    Kal ni kan in chimh cang nain kal na duh rih lo ahcun ‘hmai thla lole tu hnu thla 2 ah ka kalter te uh’ ti khawh asi ko nain hnu ah na kal ṭhan hrim lai ti aamahkhan khawh asi lo caah ti lo a ṭha, nain Australia hi cu ti zongah a poi tuk leemlo.

    Chinmi hi ramthumnak kal tikah phorh a ngah lomi phorh kan hmang tuk. Letphettoh, sapherh, ngasa car, anthor car, tbk., Kawlram chuak eidin pawl hi phorh ngah lomi an si.

    Nan i phorhmi an hmuh ahcun hlonhpiak le tangka dantat na si pinah na tuanbia record ah ‘phorh onh lomi aa phorh’ tiin an ṭial caah hmailei ram chung na um tik le citizen na sok tikah an zoh ṭhan lengmang caah i phorh hlah ulaw a ṭha.

    US President Donald Trump cu refugee a kan hloh ko. Amah kai hnu cun ralzaam lak ding milu tamtuk a ṭhumh caah Chinmi lawng si loin refugee dang vialte zong ramthumnak phak a fawi ti lo. Kanmah holhlet pawl zong hi kan rian a tlawm chin lengmang i tu kum thimnak ah amah kai rih ahcun rianṭuan awk ngeih loin dinhter kan tongte kho men.

    Adang tampi um rih, refugee a sokmi le refugee chungkhat a ngeimi caah theihtlei tampi an um caah atang VIDEO ah tling tein zoh ve. Na hawile zong rak kua ve hna.

    • Kal ni ah zuurit buin a rami cu
    • Kal lai ah nau nan pawi ahcun
    • Kal lai ah nau nan ngeih ahcun
    • Kal ni chimh cangmi kan in leet mi hna aruang
    • Lai nu pakhat cu US um a vapa nih a auh i
    • Thi sit hnu thla zeizat dah visa ngah asi
    • Kal ni chimh cangmi nih ‘hmai thla lole tu hnu thla 3 ah ka kalter te uh’ ti khawh asi nain
    • Adang tampi um rih, theih an herh ve tiah na ruahmi rak kua ve hna

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.