VIDEO – CNF fale kong ruat in Van Hlei Sung a ttap ruangmang

CNF bawmhnak caah hlasa dingin Malaysia a phanmi awṭha Van Hlei Sung @Sungsung cu nizaan ah The Chin Express he tonbiaruahnak (interview) kan ngeih lio ah mitthli he a ttap ruangmang, a ttahnak ah a holh aw zong ther dih.

Facebook lawngin kan theih ve i a mihring kan chawnhbiak bal lo tikah hi tlukin dawtnak a ngeih hi kan rak hngal ve lo. Suimilaam 1 chung a sin kan um cu a nuam taktak; a mithmai panh i aa nih kho peng, aa tong bal lomi kan si nain a hmurka in bia a cat kho lo. Mittha le mi tluangtlam taktak a rak si.

Interview tuah cu ‘a nuam tuk’ ti a um theng bal lo, nain Sungsung interview tuah cu phun dang ngai asi. A hmai panh tuk i nuam taktak in a kan leh peng caah kanmah zong kan i nuam tuk.

Kan nih cuahmah liopi ah CNF kong kan hal i nikhua aa thleng dih. ‘CNF hi a ttanhtu an tampi bantukin a soiseltu an um ve si kaw, CNF hi tha kan pek cio awk si ti na ruat maw?’ tiah kan hal.

“CNF hi tha kan pek hrim hna awk an si. Ram le miphun caah tiah phaisa ngah lo pumpek tein an ttuan,” tiah Sungsung nih a kan leh.

“Malaysia CNF upa pawl hna hi tangka fang 1 hmanh an ngah lo buin, khua le ram an dawt tuk ruangah zaanghlei cawi tein CNF caah an ttuan, khua le ram caah an pawcawmnak rian an off, atu kanmah hna rawl a kan dangh.

“Cun, Laitlang i CNF/A cu rawl ei awk hmanh an ngeih lo buin khua le ram an dawt tuk ruangah an ttuan peng…” a hung ti vial ah CNA fale hna ramtang ah meh loin banhla hnah cung i rawl an ei lio hmanthlak a hmuhmi aa hung thei i a hnarno ruh a ttam thluahmah.

Ka ttap sual lai tiin aa sum chih, ttah a duh lo tuk caah “ka ngaihchia” ati pah in aa nihter chih len nain chunglei nih a tuar khawh lo cang cun a mitthli a luang thliahmah.

Mitthli hnawhnak caah SuiSui nih tissue a pek i aa hnawh khawh in ti hna a ding len nain fawi tein a bia peh kho ti lo. Minutes 2 hnu hrawngah a bia a peh tthan nain [CNA fale kong i a ngaihchiatnak thinlung a dam thlu rih lo caah] a aw ther dih.

Sungsung hi mino te asi. Amah tthi tampi cu nuamh le laam an duh lingcing le tlangval kongah an buai lingcing si caah ram le miphun kong hmanh a ruat rih lomi an tampi. Hi tlukin miphun dawtnak le zawnruahnak nun a rak ngeih cu uar a um taktak.

Atang video ah Interview tling tein zoh khawh asi.

  • CNF Concert le Malaysia tlangval pawl kong…
  • Va caah a duhmi pa kong…
  • Dawt Hlei Tlem le Dawt Hlei Hniang kong…
  • Album chuah aa timhmi kong…
  • Love song sak a sual maw…
  • Laimi sin hlasak in pawcawm…
  • A nulepa nih an cawnpiaknak kong…
  • Soisel ton kong le a dangdang…
  • A fans pawl sin bia a cahmi zong ttha taktak, zoh khawh cio i zuam usih.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.