Myanmar Vice President [2] Pu Henry Van Thio le a nupi Dr. Anna Sui Hluan nih Yangon, Hmawbi khua ah a ummi ngaktah sianginn ‘Love Children’s Home’ an va len hna.
Nizaan cu Zarhpini a si bang Pathian thangthat ttinak le Pu Henry Van Thio le a nupi Dr. Anna Sui Hluan nih thazaang peknak bia an chim. Bawmhnak tete zong an pek hna. Bia an chimmi chungin a tanglei hi Beechy Thang nih a tawinak in a langhtermi a si.
Vice President Henry Van Ṭhio: Dawtmi zumtu nan nih thla nan ka campiak ti thawng ka theih paoh ah hin ram le miphun ca i rian ka ttuannak ah ka tha a ka nuamh ter. Kan himnak le kan khamhtu taktak cu Pathian lawnglawng hi a si ko. Cucu ka nunnak ah mithmuh kut tongh in ka rak ton mi a si. Nan thlacampiaknak hi ka herh zungzal ko, cucaah pehzulh in thla rak ka campiak peng ko u mu.
Dr. Anna Sui Hluan: Kanmah le kan sining cio in hohmanh nih tluk lomi sinak (uniqueness) kan ngei. Kan mah le kan mah kan i dawt a hau. Kanmah kan i dawt hmasa lawnglawng ah pakhat le pakhat kan i daw kho lai i thla kan i campiak kho lai. Pathian nih a kan ser lio te i kan man hi i theih cio hna u sih. Kan dihlak in a man a sunglawi tuk mi lawngte kan si.
