Vawlei mirumbik Pu Elon Musk nih Russia tukmi Ukraine ah cutuh internet a pek

- Advertisement -

Russia nih Ukraine a tuknak ni 3 asi cang i Ukraine ram hmun tampi ah internet hri le phone tung an rawh dih caah chungkhat an i pehtlai kho lo, thawngpang zong an thei kho lo.

Cucaah, Tesla le SpaceX company hruaitu vawlei mirumbik Pu Elon Musk nih a cuṭuh internet Starlink cu Ukraine ram ah hman khawh dingin a tuah cang.

Ukraine ram ah Pu Elon Musk nih a cuṭuh internet line tlaihnak seh zong a kuat thluahmah.

Pu Elon Musk nih, “Starlink cuṭuh internet cu atu hi Ukraine ah hman khawh asi cang. Cuṭuh internet line tlaihnak seh zong tam deuh in Ukraine ah kan kuat lio asi,” tiin Twitter ah a thanh.

Ukraine cozah reng sang pakhat nih bawmh a hal hnu ah atu bantukin Pu Musk nih a leh hi si.

Ukraine Prime Minister changtu Pu Mykhailo Federov nih, “Elon Musk, Mars uk nai zuam lio ah — Russia nih Ukraine uk dingin a kan tuk! Na rocket pawl van in an hung ṭum lio ah — Russia rocket nih Ukraine mipi an kah!,” tiin Twitter ah a ṭial i Elon Musk a tag/mention.

Pu Elon Musk internet company Starlink nih cun van ah cuṭuh tampi thlah i cuka cun vawlei ah internet a pek, cucaah phone tung le internet hri um lonak pawl zongah salong hmete (ṭalawn tia te) in hman khawh asi. Internet zong a rang ngai — Download speed 80 – 300MBPs hrawng asi i ping 20 – 60ms hrawng asi.

Ral, thlichia le tilet nih phone tung le internet hri an hrawh dih zongah Starlink cuṭuh internet cu hman khawh peng asi. Phone line le internet um bal lonak khuate zongah ngah.

Atu hi van ah Starlink cuṭuh thong 1 le 469 an um. 272 zong a rauh hlan ah an thlah chap lai. Kum tlawmpal hnu ahcun thong 42 (42,000) hrawng thlah a timh i ramkip (vawleipumpi) internet pek dih a timh. Atu hi ram 12;

  1. US
  2. Canada
  3. Australia
  4. New Zealand
  5. Denmark
  6. Austria
  7. Belgium
  8. France
  9. Germany
  10. Netherlands
  11. UK le
  12. Ukraine ram cu Starlink internet a ngah cang.

Hnu ahcun, Starlink cuṭuh internet hi vawleicung internet ah a rangbik si te lai, tiah zumh asi.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...

US le NATO nih Ukraine sinah ral tuknak vanlawng kuat an timh

US le NATO nih Ukraine sinah ral tuknak vanlawng kuat dingin khua an khan liopi asi.US Ramdang Vuanci...