Vawlei mirumbik Pu Elon Musk nih $20 billion man Tesla share a zuar ahcun zeizat dah tax a pek lai?

- Advertisement -

Hmasa ah ka ṭial cang bangin, vawlei mirumbik Tesla le SpaceX CEO Pu Elon Musk nih, “Ka Tesla share 10% ka zuar lai maw?” tiin Twitter ah poll a tuah i mipi nih bia nan khiahmi paoh ka zulh lai ati. Mipi nih “zuar ko” an ti — mah kong cu mah hi hmet law rel khawh asi.

Pu Musk, kum 50 nih Tesla share 170.49 million a ngeih. Mah pinah, option tampi zong a ngeih rih. Option kong hi cu um rih sehlaw, a Tesla share 170.49 million chungah 10% cu 17.09 million asi.

Tuni mah ca ka ṭial lio hi Tesla share 1 ah $1,222.09 asi caah 17.09 million cu $20.08 billion asi lai.

$20.08 billion chung ahcun Pu Musk nih zeizat dah US cozah sinah tax a pek lai?

$5 billion hrawng lawng a pek lai. Mah hmanh cu, adang invest a tuahmi i a sunghmi pawl a zuh lo lawngah asi lai.

Pu Musk nihhin Tesla share a miakmi a tam taktak. US upadi ningah, share na cawk i kum 1 hnu ah na miakmi (long-term capital gain) cu income tax nakin a tlawm deuh lawng tax pek asi. Cucaah $20.08 billion chung ahhin zatuak tlawmte lawng tax pek a hau i $5 billion hrawng lawng asi lai.

Tesla company cu kum 2010 ah public company (mipi nih share cawk khawhmi company) ah thlen asi. Mah lio ah Pu Musk nih Tesla share 1 ah dollar pia 49 in ceilak a rak cawk, tiah SEC cazin ah kan hmuh. Hnu ahcun Tesla share 1 kha 5 ah an ṭhen.

Cucaah, Pu Musk nih Tesla share a cawknak zin hi share 1 ah dollar pia 10 lawng asi. Mah ruang cun $20.08 billion a cawknak zin hi a tlawm parek te asi i a dihlak dengmang in a miakmi lawngte asi caah miakmi tax 20% lawng pek a hau, income tax 37% pek a haumi azin cu tlawm palte lawng asi.

Cucaah $20.08 billion chungah tax a pek dingmi dihlak hi $5 billion hrawng lawng asi lai.

Kum 1 ah income $523,600 leng a hmumi cu 37% bak income tax pek a hau, nain kum 1 leng invest tuah hnu ah na miakmi (long-term capital gain) cu 20% lawng tax pek asi.

Kum 2010 ah Tesla cu mipi company (public company) ah an thlen thokin atutiang ahhin Pu Musk nih a share voi 2 lawng a zuar rih.

2016 ah a share 2.7 million cu $593 million in a rak zuar. 2010 July thla i Tesla company mipi company ah an thlen tan ahkhan a share 1.4 million cu $24 million in a rak zuar.

Pu Musk nih atu lio a ngeihmi Tesla share le option vialte hi $338 billion man asi, tiah Bloomberg nih tuni ah a langhter.

Atu lio vawlei cung mirumbik asi pinah, US tuanbia ahhin liamcia kum 40 chungah $300 billion leng a ngei khomi minung hohmanh an um bal lo. Pu Elon Musk lawng hi asi.

Pu Musk nih a Tesla share 19 million leng hi ni 1 ahcun a zuar dih theng lai lo. Hi zatzat ni 1 chungah a zuar dih ahcun Tesla share man a tla tuk lai i Tesla company sipuaizi a hnorsuan lai pinah Tesla share torlecheng a ngei vemi mirum tumtlang Board of Directors le investor tumtlang pawl an phunzai tuk lai.

Ni 1 ah tlawm tete in thla tampi silole kum tlawmpal chung hmanh a zuar te men lai, ti hi zumh a um deuh.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...