Vawlei Media nganbik Reuters nih CDF le CNF kong hitin a tial

- Advertisement -
  • CDF-Hakha ralkap hi 2,000 hrawng kan si
  • Boxing thonghthiam CDF-Mindat ralkap Za Latt Thwey hliam a ton caah India sizung phan
  • Mizoram ah a zaammi Chin MP 30 nih CDF an bawmh ve hna
  • Chin state pumpi CDF vialte cu CNF hruainak in NUG cozah he an i bawm
  • CDF rawl, thilpuan, sii le hriamnam cawknak kong

Vawlei cung media nganbik a si vemi Reuters nih CDF, CNF, Chin MP pawl le NUG cozah hruaitu pawl a ton hna i Chin state boruak kong sau taktak atanglei bangin a ṭial.

Myanmar ram boxing thongh zuamnak ah aa rak thong tawnmi Mindat Chin pa Za Latt Thwey, kum 25 [mah hi hmet law FB ah follow] nih, “Myanmar ralkap kah hna dingin Mindat khua pawng tlanghram kan ṭhut lio ah an kan kah i ka ban ah an ka khen,” tiah a chim.

“Tlik ka timh lio ah ka balah ah an ka kah nolh,” tiah atu lio aa dornak Mizoram state um inn pakhat hmai ah Reuters sinah a chim — amah nih boxing kai thonghnak min hi hmang uh, a timi si.

Reuters media nih CDF ralkap 4 Mizoram ah bia a hal hna lio

Ruhhlai thiam India sibawi nih, “Meithal kahnak hma a tuarmi cu X-ray kan thlak i a ruh kuai dihmi kan hmuh,” tiah a chim.

Za Latt Thwey hliam a ton hi May thla tanṭim ah asi i mah lio cun Chin state ah ral a tho rih lo. Amah le boxing aa thong vemi a hawile 5 telh in minung 7 nih Mindat khua ah ralhrang kahdoh an thok.

Mah hnu in Chin state peng dang cio ah CDF pawl nih kah an thok cio. Atu hi CDF phu 15 hrawng an um.

CDF-Hakha ralkap nih, “Ramtang hmun kenkip ah kan ei awk rawl le hman awk hriamnam tampi kan i pon hna. Aa ruang tein Myanmar ralkap kan doh khawhnak dingah CNF nih raltuk tinṭan a kan pek i a kan hruai,” tiah an chim.

CNF biachimtu Salai Htet Ni nih, “Ralkap nih uknak an lak hnu in sandahpiahmi Chin mino pawl cu phu hme tete in raltuk ning kan chimh hna,” tiah a chim.

“Kan i lungrualmi le mipi nih thazaang a kan pekmi hi kan thazaang asi ko,” tiah Chin khualipi Hakha in a rami CDF ralkap, kum 32 nih a chim ve.

Pa huaisen Mindat Chin paralṭha Za Latt Thwey nih a phone in CDF-Mindat tinṭan an kai lio Reuters media a piah hna

Khohsuai le Lai meithal

History degree a ngah cangmi si nain ralkap uknak duhlo ruangah CDF-Hakha a lutmi pakhat nih, “Buaibai lo tein sandah a piah komi rumro ralkap nih an tukvelhmi hna le thahmi hna ka celh lo caah meithal ka tlaih ve nak asi,” tiah a chim.

“Hakha ah sandahpiahtu mino pawl nih facang, chiti, khohsuai le sii pawl cu Hakha peng ramtang hmun kenkip ah an khon hna,” tiah CDF ralkap 2 nih an chim.

“April thla ah, CDF phu tlawmpal cu CNF headquarters Camp Victoria ah kan i tong hna i ralkap hi hriamnam in doh lawlaw cang dingin biaruahnak kan ngei hna,” tiah CDF-Hakha ralkap pakhat nih a chim.

“CNF hi Chin state pumpi ah ralkap uknak dotu CDF pawl raltuk a chimtu asi i dothlennak rian ah a biapi taktakmi asi,” tiah CDF ralkap 2 le NUG cozah hruaitu pakhat nih an chim.

CDF an dirhka thla tlawmpal chungah, Hakha mino 2,000 dengmang cu raltuk cawng dingin Camp Victoria ah an kuat hna, tiah CDF ralkap 2 nih cun an chimchap.

Reuters nih CDF ralkap pakhat hman an thlakmi

CDF caah a herhmi

CDF-Mindat caah a herhmi tangka cu ramdang um Chin mipi le NUG cozah sin in a ra, tiah ralkap nih phuahmi Chin MP pakhat nih a chim – a min langhter a duh lo.

“A herhmi rawl, thilpuan, sii le hriamnam cu India telh in lam tampi in thla fatin te hi CDF sinah a phan peng ko.

“Hriamnam le bomb hi cawk a har bikmi si,” tiah Chin MP, NUG hruaitu le CDF ralkap 3 nih an chim.

Ralkap 2,000 hrawng a simi CDF-Hakha cu raltuknak kong, sakhan kongkau le a herhmi vialte kongah minung 21 nih an hruai hna, tiah CDF-Hakha ralkap 2 nih an chim.

Reuters nih CDF ralkap hman an thlakmi

Chin MP pawl zong nih CDF an dirkamh hna

Atu hi Mizoram ah Chin MP 30 hrawng an zaam. CDM a tuahmi palik pawl Mizoram ah an zaam hmasa cem, hnu ah Chin MP pawl in mipi tiah atu cun Chinmi 12,900 hrawng Mizoram ah an hung zaam cang, tiah min langhter a duh lomi Mizoram palik bawi pakhat nih a chim.

Chin state ah ral a fah chin lengmang tikah, Chin MP cheukhat le hruaitu pawl zong nih CDF pawl cu thazaang an pek hna i, i lungrual dingin an bawmh ve hna.

“NUG cozah nih dothlennak tuahtu hriamtlai phu vialte hi CNF hruainak pakhat tangah um hna seh ti a duh,” tiah Chin MP le NUG hruaitu pakhat nih an chim.

CNF biachimtu Salai Htet Ni nih, “CNF nih Chin state runvennak le ralkap vialte hruai in NUG he rianṭuan ṭi dingin lungtlinnak kan ngei,” tiah a chim.

CDF ralkap Za Latt Thwey
Hliam tongmi an i thlop ning

Za Latt Thwey nih, “An ka kah hliam hnu ah, Mandalay sizung ah i thlop dingin kal dingin thla tampi chung kai zuam peng hnu ah, ṭihnung tuk tiin kai sungphiat,” tiah a chim.

“November thla thok ahkhan, ka chungkhar le hawikom sin in tangka tlawmpal kai rawnh i ni 5 chung motorcycle in India ram ah ka ra – mah vialte chung cu meithal in voi 2 an kahnak hma, a ruh kuai dihmi cu amah tein Mindat khua ah aa zohkhenh i a tuar peng.

“Atu cu boxing kai thong kho ti lai lo. Nain hawi bantukin nitin ka cawlcangh khawh ve nak hnga, lo tal ka tuah khawhnak hnga ka ban remh a hau,” ati.

Theihternak: A sau tuk caah Laimi nih kan theih cia deuhmi pawl cu leh loin kan lanhtak hna.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...