Vawlei cungah Judah mi 14.7 million an um, Israel ah 6.6 million an um

Vawlei cungah Judah mi 14.7 million an um, Israel ah 6.6 million an um

Atu hi Israel ram ahcun kum hlun thlah in kum thar an don liopi a si. Judah/Hebrew Calendar ahcun atu hi kum 5779 aa thok lio a si. September 9 in 11 tiang Judah Kum Thar (Rosh Hashanah) an lawm lai.

Judah mi caah kum 1 a dongh in kum thar aa thok caan a si bang, biaknak le university cheukhat hna nih kum hlun chung thil sining an thanh i kum thar caah khuakhan an thok caan zong a si.

Vawlei pumpi ah Judah mi ting 147 an um, ni kum nakin ting 1 an karh. Mah lakah a tambik cu Israel le US ram ah an um, tiah Hebrew University in milu-reltu Sergio Della Pergola nih a chim.

Nain, Judah ram Israel ah a ummi nakin ramleng ah a ummi an tam deuh. Israel ah 6.6 million an um i ramleng ah 8.1 million an um.

US ramah 5.7 million an um. France ah 453,000, Canada ah 391,000 le UK ah 290,000 an um.

“Judah mi ka si aa ti i Judah biaknak a biami paoh kha Judah mi kan ti hna,” tiah milu reltu nih a chim.

Nain, Israel Kirnak Upadi ningin tuak ahcun Israel ah a peem kho Judah mi 23.5 million hrawng an um. Israel Kirnak Upadi nih cun, Judah cithlak a simi paoh kha an duh ahcun Israel rammi/citizen a pek hna.

Judah Kum Thar ah Judah mi hna thla an cam lio – Jerusalem i Ttahnak Vampang (Wailing/Western Wall), 2017 video

https://youtu.be/0-uwUdKT7VU

Ttahnak Vampang (Wailing Wall or Western Wall) – Bible le Israel tadinca Haaretz nih an ṭial ning ahcun, BC 957 ahkhan Jerusalem ah Israel siangpahrang Solomon nih biakinn a rak sak. BC 720 ah Jerusalem cu Assiria siangpahrang nih a tuk i Israel miphun 10 cu ramleng ah a dawi dih hna. Mah hnu in Solomon Biakinn cu ral nih an ttheh thluahmah. BC 586 ahcun Babilon siangpahrang Nebukhadnezzar nih a hrawh dih cikcek.

Babilon pennak a dih in, Persia siangpahrang Sairas nih Jerusalem a uk i BC 538 ah Judah mi pawl cu kirnak nawl a pek hna. A rung kirmi Judah miphun pawl nih BC 515 ah Avoi 2nk Biakinn an sak tthan. Judah le Edom kahpia Herod siangpahrang nih Avoi 2nk Biakinn sak cu a bawmh hna i BC 20 ah an lim. AD 66 thokin Rom siangpahrang Vespasian le a fapa siangpahrang Titus (Bible chung i Paul zultu Titus kha cu si lo) nih Avoi 2nk Biakinn cu an hrawh lengmang i AD 70 ah an hrawh dih, nain nitlaklei vampang cu an hrawk thlu lo (atu ahcun adang vampang zong an remh tthan cang hna). 

Mah hmun cu David nih biakinn (Pathian Inn) saknak caah hmun a rak cawk i a fapa Solomon nih biakinn cu a sak, i Pathian sinah thla a rak cam tawnnak a si – 1 Siangpahrang 8: 17-61) caah Judah miphun hna cu a taangmi Nitlaklei Vampang hram ah thla an cam fatin lungkuai tukin an ttap peng. Mah ruangah “Ttahnak Vampang” tiin mipi nih kan auhnak a si, anmah Judah mi nih cun ‘Nitlaklei Vampang’ tiin an auh. Ni khatkhat ahcun Jerusalem (atu lio Palestine he an i cuhmi) hi a ningpi in kan lak lai i Avoi 3nk Biakinn (Third Temple) kan sak tthan te lai, tiah Judah/Israel nih aa tinh.

Arab le Muslims ram pawl ahcun Judah mi 270,000; Turkey ram ah 15,000, Iran ah 8,500 le Morocco ah 2,000 lawng an um.

Israel ram cu kum 1948 ah dirh a rak si. Mah hlan ahcun Muslim ram pawl ah Judah mi 850,000 hrawng an rak um. Israel ram an dirh hnu ah an peem hna.

Israel ram cu siangpahrang David le Solomon chan hlan piin a rak um cang. Nain, BC 720 ah Assiria siangpahrang nih a tuk i Israel miphun 10 ningin ramleng ah a dawi dih hna. Atu lio Israel (chanthar Israel) cu kum 1948 ah dirhmi a si.

2017 ah US President Donald Trump, Ttahnak Vampang ah thla a rak cam lio

Germany ram ah Judah mi 119,000 an um. Vawlei Ralpi 2 lio ah Germany cozah lutlai Hitler nih Judah mi 6 million a rak thah hna caah ral a dihka ahcun 37,000 lawng an rak taang. Atu cu an karh ngai ve cang.

Judah mi 100 fai an umnak ram 98 a um.

Israel Cozah Milu Relnak Zung nih cazin a chuahmi zoh tikah, atu hi Israel ram ah minung 8.907 million an um – ni kum nakin 162,000 an tam deuh. Mah chungah 74.4% (6.625 million) cu Judah mi lawngte an si. 1.864 million cu Arab/muslims an si i a taangmi 418,000 cu adang miphun hme tete an si.

Kum 2024 ahcun kan ram milu ting 100 (10 million) kan phan lai, tiah cozah nih a ruahdamh.

Israel rammi chungin 44.3% hrawng nih ‘biaknak ah kaa pe tuk lo’ an ti, 21.4% nih ‘pipu nunphung ka tlaihchan’ an ti, 11.5% nih ‘biaknak ah kaa pe ko’ an ti i 10.2% nih ‘Judah biaknak ah kaa biatak tuk’ an ti.

Israel nauchuak karh ning, buaktlak in tuak tikah nu 1 nih fa 3 an hrin, Chawleh I-bawmhnak le Thanchonak (OECD) chungtel ram 34 lakah Israel ram ahhin nauchuak an tam bik.

2017 chung ah Israel ah nauchuak dihlak 175,000 hrawng an si, a thimi dihlak (bawhte in tar tiang) 43,000 hrawng an si. Ramdang in Israel ah a rung peemmi 25,000 hrawng an si.

Israel President Reuven Rivlin nih Mirang holh in Judah Kum Thar donnak bia a chim lio video zong a thlah cang, vawlei pumpi um Judah mi vialte i pehtlaih a biapitnak kong cu Hebrew le Mirang holh in biatak tein a chim.

“Israel le ramkip um Judah mi vialte hna, Jerusalem in nan kut kaan tlaih hna, nan cungah Kum Thar lawmhnak le daihnak tlung ko seh,” tiah President nih a chim.

“Nihin i vawlei pumpi ah aa tthekmi Judah mi vialte hna hi kan i pehtlai dih. Tuanbia pakhat aa hrawm dihmi kan si. Atu lio hi, a kan fonhtu nakin a kan tthencheutu thil kha micheu nih fiang deuh in an hmuh lio caan a si ka hngalh.”

“Micheu caah cun, kan i khahnak hmuh zong a har ko lai. Khat le khat kan i theihthiam lo caan a um ka hngalh. Hawikom ah kan i ruah lo caan a um zong ka hngalh. Atu cu Kum Thar kan panh cuahmah bang, kan i hrawmmi, kan dihlak a kan pehtlaitu thil hna kha ruat cio usih…,” a ti.

“Vawlei cung ramkip um Judah mi paoh cu Orthodox Judah biaknak a biami an si lo zongah Ttahnak Vampang ah zungzal in thlacamnak nawl pek si hna seh” tiin 2016 ah biachahnak an rak tuah nain ni kum ah ‘nawl pek si rih hna hlah seh’ an ti tthan caah ramleng um Judah mi le Israel um Judah mi karlak ah fakpi in bia alnak a rak chuak.

Mah kong he pehtlai in, Israel president nih hitin bia a chimnak si ttheo lai tiah zumh a si.

Charhchan: Bible, The Times of Israel, The Jerusalem Post le Haaretz

Leave a Reply

Your email address will not be published. Required fields are marked *