Ram thumnak um Vaurawng Zunthil phu nih Yaw Defense Force (YDF) caah Facebook live thlah in phaisa an kawlpiak hna i $60,000 leng (Kawlram ting thong 1 leng) an hmuhpiak hna.
Vaurawng Zuunthil phu hruaitu Dr. Bawi Uk Thang nih, “YDF caah $60,000 leng kan hmuhpiak hna,” tiah a chim.
YDF cu Magway ramṭhen Gangaw district i;
- Gangaw peng
- Saw peng
- Kyaw peng
- Khaukhtoh peng le
- Htilin peng ah a ummi an si.
Chin state, Mindat le Kanpetlet peng he aa rimi si i Chinmi tampip an umnak asi.
Lai nu Tu Tu nih, “YDF hi ralkap 5,000 hrawng kan si. 3,000 hrawng hi atu hriamnam a tlai liomi (active) an si i 2,000 hrawng cu herh tikah auh ding kenret ralkap (reserve) an si,” tiah Vaurawng Zuunthil upa hna sinah a chim.
“Chin state le Sagaing region ramri, alai ah ummi kan si caah kannih lei hi ral a tam ngai.
“Tangka tampi bawm khotu kan ngeih lo caah kan ralkap pawl cu hriamnam le rawl ei awk an chanbau ngai… cucaah ramdang um kanmah Chinmi Vaurawng Zuunthil upa sinah bawmh kan in hal hna hi si,” tiah an dirhmun a chimmi cu ram thumnak um Chinmi thong tampi nih an hmuh tikah an sia herh tuk i atu bantukin Vaurawng Zuunthil sin in $60,000 leng an hlut hi si.
Vaurawng Zuunthil phu nihhin CDF-Mindat ca zongah $60,000 leng (Kawlram ting thong 1 leng) an hmuhpiak ve hna.
CDF-KKG ca zongah $101,000 leng (Kawlram ting thong 2 dengmang) an hmuhpiak hna.
CDF-Thantlang ca zongah $80,000 leng (K142 million) an hmuhpiak hna.
Chin Emergency Medical Team ca zongah $100,000 (Kawlram ting thong 2 deng) an hmuhpiak hna.
Dr. Bawi Uk Thang nih, “Myanmar ralkap nih February 1 ah mipi thimmi cozah uknak a chuh thokin dothlennak tuahtu hna caah phaisa kan kawlpiak hna i atutiang ahhin $2 million dengmang (Kawlram ting thong 30 leng) kan hmuhpiak cang hna,” tiah a chim.
Cucaah, Vaurawng Zuunthil phu cu vawleicung khuaza ramkip um Chinmi vialte a kan lungrual tertu bik asi tiin ChinTube nih ‘Kum 2021 Mi a Hipbiktu Laksawng’ a pek.
