Vaurawng Zuunthil phu nih Kawlram dothlennak tuahtu hna cu phaisa kan kawlpiak hna i atutiang ahhin $2 million dengmang kan hmuh cang, tiah an hruaitu Dr. Bawi Uk Thang nih ChinTube ah a chim.
Atu lio tangka thlen ret cun $2 million cu Kawlram tangka ting thong 30 (K3 billion) leng asi.
“Khuaza ramkip um Chinmi hna nih dothlennak caah phaisa tampi nan thawh cio caah kan i lawm tuk.
“A khua khua zongin nan thawh. Inn 100 hrawng a simi Vanzang khuami nih dollar ting 3 (Kawlram ting thong 5 leng) an thawh cang.
“Hriangkhan khua zong nih dollar ting 1 leng an thawh cang,” tiah a chim.
Vaurawng Zuunthil nih Kawlram Dothlennak caah phaisa $2M dengmang an kawl hmuhpiakmi hna chungah;
1. CDF-Mindat caah $61,000 leng (Kawlram ting thong 1) an hmuhpiakmi hna,
2. CDF-KKG caah $101,500 (Kawlram ting thong 2 dengmang) an hmuhpiakmi hna le
3. Van Hlei Sung hlasaknak in dothlennak tuahtu Chin Emergency Medical Team caah $100,000 an hmuhpiakmi hna zong aa tel.
ChinTube’s Most Influential Award 2021
Vaurawng Zuunthil cu Kawlram Dothlennak caah phaisa a kawl kho bikmi le mipi nih zumh le hlut bikmi phu asi caah ChinTube nih ‘Kum 2021 Mipi Hip Biktu Laksawng (Most Influential Award)’ a pek — a cung bik hmanthlak kan tarmi khi laksawng an lak lio cu si.
Vaurawng Zuunthil phu nih ram le miphun caah zaanghleicawi tein phaisa an kawlmi an retheihnak ChinTube nih theihpinak laksawng a pekmi hna cu Chinland Football Club ngeitu Thawng Tha Thang zong nih a lawmhpi tuk hna.
Thawng Tha Thang nih, “Congratulations Vaurawng Zuunthil (ChinTube‘s most Influential of the year 2021),” tiah lawmhpinak bia a chim.
“Na kan motivate. Miphun lungrualnak nan ser. Dingthlulairelnak nan thawnter. Emotion lawng si lo in passion driven thawnnak le miphun dawtnak muru he a kal mi nan si.
“Vaurawng par kan ram le kan miphun caah par chin ko seh,” ati.
