US ram um Vanzang khuami nih “Lakhruak Miphun Himnak (ENSF)” caah tiin Chin Miphun Ralkap (CNF/A) caah $175,000 (Kawlram ting thong 2 le cheu deng) an thawh cang, tiah kan theih.

$150,000 leng kan thawh lai tiin an i tinh nain an vun thawh thluahmah i atutiang ah $175,000 an thawh hi si.

Atu zong an thawh cuahmah liopi asi rih. $200,000 zong an tlinhte khawh men.

Thantlang peng ah a ummi Vanzang khua cu inn 120 hrawng lawng an si nain miphun caah tangka an hlutmi cu a tam taktak.

Minung pakhat nih $10,000, $5,000, $4,000 tbk in an thawh hna caah minung an tlawm nain hi zatzat a chuahnak hi si.

CNF/A ca lawng si loin mipi ralkap duhlo langhternak (CDM) ca zongah an thawh cuahmah lio asi i tam ngai a chuak cang.

Vanzang khuami hi hlan lio Mirang nih a kan uk lio chan te khan ramkhel lei ah aa hliphlau ngaimi le ram le miphun a daw ngaimi an si. An lung zong aa rual.

Chawlehnak (Sipuaizi) lei zongah an ti kho ngai. US um Vanzangg khuami hi Sushi dawr (restaurant) a ngeimi an tam ngai.