Tu thla, hmai thla le a ra laimi thla tlawmpal chungah Myanmar khuapi 3 ah kahdonak a chuak kho, tiin Yangon um US Tanzung nih zahan ah ralrin peknak cathanh a chuah.
September 26, October 16 le 26 ah Nay Pyi Taw ah kahdonak a chuak kho menmi kong cu Myanmar palek nih an hlat cuahmah lio asi, tiah US Tanzung nih a ttial.
Kahdonak cu Nay Pyi Taw, Yangon le Mandalay khuapi ah a chuak kho men, ati.
Zei bantuk kahdonak dah a chuak kho i aho te nih dah an tuah khawh, ti cu a langhter lo.
Ralring tein um cio uh, media ah thawngpang thar check lengmang ulaw chungkhat le hawikom an himnak hnga theihter hna uh, ati.
Tutan hi US Tanzung nih 2019 chungah avoi 3nak ralrin peknak cathanh a chuah si cang. March thla i New Zealand ram muslim biakinn thahnawnnak a chuah hnu April thla ahkhan avoi 1nak ralrin peknak cathanh a chuah i “ralhrang a simi ISIS le al-Qaida nih thahnawnnak an tuah khawh men” ati.
August thla i miphun hriamtlai bu nih Pyin Oo Lwin ah kahdonak an tuah ka zongah US Tanzung nih “Shan state chaklei le Mandalay ah ralring tein um uh” tiin ralrin peknak a rak tuah.
