US Ram Ah Kawlrammi 170,000 Leng Refugee In Kan Phan Cang

US Ram Ah Kawlrammi 170,000 Leng Refugee In Kan Phan Cang

Kum 2000 thokin nihin tiangah Myanmar rammi 173,150 cu US ramah refugee in kan phan cang.

Mah chungah 25,000 leng cu Indiana state ah kan um hna. 25,000 chungah 19,440 cu Indianapolis khuapi ah kan um.

US ram ah refugee dirhmun in a phanmi le lam dangdang in a phan Kawlrammi dihlak fonh ahcun minunng 300,000 leng kan si cang lai tiah zumh a si.

High School aa limmi kan fale chungin college kai an tam chin lengmang

US khuasa Kawlrammi chungin college a kai kan tam chin lengmang

US a phan Kawlrammi kan fale chungin college a kaimi an tam chin lengmang caah lawmh a um ngaingai. Liamcia kum 7 le tu kum tahchun tikah college a kaimi kan fanaule 114% bak an karh.

“US ram khuasa milu tlawm miphun vialte lakah Kawlrammi kan fale hna hi college kai a tambik lei an si ve, tu kum lebang cu High School aa limmi kan fale dihlak dengmang (92%) bak college an kai cang,” tiah BACI nih thawng a thanh.

Kum 2012 ahcun High School aa limmi kan fale dihlak chungah 43% lawng hi college an rak kai nain, 2018 ahcun 92% bak an kai cang.

2012 lio le tu kum kan sining tuak tikah 114% bakin college kai kan karh.

“College kai aa timmi kan fanaule an karh chin lengmangmi kan hmuh tikah kan i lawm tuk hringhran,” tiah Lian Sang, High School dih Kawlrammi hna College Kainak Bawmtu BACI rianttuan nih a chim.

Kawlrammi kan fale hna cu college an kai tik zongah a dih tiang, degree ngah tiang lungsau tein an kai hna.

Liamcia kum 4 chung i college a kai Kawlrammi vialte chungah an dihlak dengmang (95%) cu degree an ngah tiang lungsau tein an kai. 2017 ahcun 96.6% an si.

Mah lio ahcun, US ram pumpi i college a kaimi dihlak chungah 73.9% lawng hi degree ngah tiang, a dih tiang an kai.

Kawlrammi hna cu miphun dang he tahchun tikah fimcawmnak lei ah tei kan rial deuh ngaingai ti a lang.

Eleventh Asian Fest at Indiana State Museum
Eleventh Asian Fest at Indiana State Museum – Indianapolis: June 24, 2018

Indiana State Cozah Lutlai Changtu nu Suzanne Crouch Zung aiawh biachimtu Maureen Hayden nih, “Indianapolis khuapi ah miphun tampi lungrual tein nan um ttimi le rian nan ttuan ttimi hi aa dawh tuk hringhran,” tiah a chim.

“Cun, nan fanaule hi zatzat college an kaimi nih hin Indiana state a liannganternak, ngandamternak, le hmun ttha deuh siternak caah na kanh bawmh tuk ti kha fiang taktak in tehte a langhter.”

“Indiana state ah nan ummi hi kaa lawm tuk. Indiana state hi khuasak tintuknak ttha deuh dingin nan ser,” tiah a chimchap.

| Burmese American Community Institute [BACI]

Leave a Reply

Your email address will not be published. Required fields are marked *