US President Donald Trump nih Iran cu kah a tim lo nain US Ralkap hriamnam ṭha bik pawl zohta hna usih.

Ralkap 3 million deng le vawlei cung leiṭhen (continents) 7 ah sakhan 4,800 leng a ngei i kum 1 ah budget $700 billion leng a hmangtu US ralkap cu vawlei cungah a ṭhawngbik asi, tiah pom cio asi. Atanglei hna hi US ralkap hriamnam ṭha bik pawl an si.

B-52 Bombers

Hmanthlak: B52 bomb thlaknak vanlawng – US Air Force nih 75 a ngeih

US Vanlawng Ralkap (Air Force) nih ‘B-52’ tiin auhmi seh-8 ngei a ngan chiahru mi bomb thlaknak vanlawng 75 hrawng a ngeih. Bombs, mines le missiles cawh in 35 tons rit a phorh khawh.

Mah vanlawng pawl hi kum 1952 in hman hram an thok hna nain liamcia kum pawl ah ṭha chin in an tharchuah ṭhan lengmang hna i atu cu vanlawng in kahmi missiles pawl zong an phor kho cang.

B-52 vanlawng pakhat nih missile 20 cio an phorh khawh. Missile par ah 1,360kg a ritmi bomb bunh khawh asi. Missile cu vanlawng in an thlah cangka in a chungah rawn ciami lam le a seh-pangka hmangin a zuang i tinhpiakmi hmun cu a khen.

B-2 bombers

Hmanthlak: B2 stealth bomber vanlawng – US Air Force nih 20 a ngeih

‘B-2’ tiin auhmi, papalak thla bantukin sermi bomb ngan pipi thlaknak vanlawng nih cun bomb sawhsawh lawng si loin nuclear hriamnam pawl zong a phorh khawh.

US Air Force nih Missouri state um Whiteman Air Force Sakhan in B-2 vanlawng 20 a hman hna, nain Guam le Indian Ocean i Diego Garcia island um US ralkap sakhan le sakhan dangdang zongin zuanter khawh an si. Atang video ah zoh khawh si.

Seh-4 ngei B-2 vanlawng pakhat nih US ralkap bomb ‘GBU-57 Massive Ordnance Penetrator’ 2 a phorh khawh. Mah hi nuclear bomb asi lomi US ralkap bomb vialte lakah a ngan bikmi si.

Mah bomb pawl cu pe 30 an sau i 13,607kg an rit. Nuclear bomb a si lomi pawl nih an phak khawh lomi vawlei tang thukpi um missiles le ralkap headquarter pawl kahnak caah sermi bomb an si.

B-2 nih cun hriamnam dang tampi zong a phorh khawh. Syria, Iraq le Afghanistan ram ah raltuknak zong an test cang.

B-1 bomb thlaknak vanlawng pawl

Hmanthlak: B-1 bomber – US nih 60 leng a ngeih

Seh 4 ngei bomb thlaknak vanlawng hi US nih 60 leng a ngeih. US Air Force vanlawng vialte lakah hriamnam tambik a phor khomi asi i cruise missile, gravity bomb le naval mines telh in 34,019kg a phorh khawh.

Liamcia caan ah, B-1 vanlawng pawl cu ‘Joint Direct Attack Munitions’ timi bomb pawl thlaknak caah an rak hman hna. Mah bomb pawl cu an mei ah duhnak paoh monghnak system bunhmi an si i pe 15 chah/thuk a pemh khomi an si.

F-22 Stealth Fighters

Hmanthlak: F-22 Raptors vanlawng – US nih 180 hrawng a ngeih

US Air Force nih F-22 vanlawng 180 hrawng a ngeih. Mah hi US raltuknak vanlawng ṭha bik asi tiah zumh ciomi asi. Na ralpa vanlawng vialte a kah khawh dih hna.

Duhnak paoh ah dik takin mongh khawhmi bomb ‘Joint Direct Attack munitions’ 2 le radar-monghmi van raldohnak missiles pawl a phorh khawh hna.

Duhnak paoh mongh khawhmi ‘Joint Direct Attack munitions’ bomb

F-22 vanlawng pawl cu na ralpa radar nih hmuh khawh lo dingin a um khawh caah, na ralpa vanlawng sakhan pawl kahnak caah hman khawh asi. Mah hnu ah na hawile nih, radar nih a hmuh khawhmi vanlawng pawl le cruise missiles pawl in rung bawmh khawh asi.

Monghmi-missile le ral kahnak rili-tang lawng pawl

Hmanthlak: ‘USS Michigan’ tiin auhmi rili tang lawng – Ohio-class submarine

US Navy nih rili tangah a um khomi lawng (submarines) tam ngai a ngeih. Rili le vawlei um na ral pawl kha duhnak poah mongh khawhmi ‘Tomahawk cruise missiles’ in kahnak caah hman khawh asi.

US Navy nih a hmanmi rili-tang lawng vialte lakah a ṭhawng bikmi cu ‘Ohio-class guided-missile submarine’ tiah auhmi an si. US Navy nih 4 a ngeih hna i Tomahawk missiles 154 cio an phorh khawh.

Mah missile pakhat cio cu a par ah 453kg a ritmi bomb bunh khawh an si i meng 1,000 hla tiang kahnak khawh an si. Cun, mah missiles 1 cio nih cun monghnak system chungah target 15 an phorh khawh caah lam tantim in na duhnak paoh ah ṭhial le mongh khawh an si. Tahchunak ah, Iran na kah nain lam tantim a phak lio ah na lung aa thlen ahcun hmun dangah tlakter khawh asi.

Ohio-class rili-tang lawng 4 pinah, US Navy nih Virginia-class le Los Angeles-class tilawng 40 leng a ngeih rih hna. Tomahawk missile an phorh khawh cio nain tlawm deuh lawng an phorh khawh.

Aircraft carriers (Vanlawng phorhnak tilawng pawl)

Vanlawng phorhnak tilawng cungah F/A- 18 vanlawng

US Navy nih vanlawng phorhnak tilawng ngan pipi 11 a hman hna lio asi. Nimitz-class 10 le Ford-class 1 an si. A tam ngaimi a lo nain, rianrang in raltuknak ah hman awk a ṭhami cu 3 lole 4 lawng an si.

Nikhatni ahkhan, ‘USS Harry Truman’ tiin auhmi vanlawng phorhnak tilawng cu Middle East ah a um.

Mah tilawng pakhat nih hin F/A-18 vanlawng telh in vanlawng 60 leng cio an phorh khawh. F/A-18 vanlawng cu van-in-vawlei kahnak missiles 2 i phorh in meng 1,200 hla tiang ral a va do kho.

Vanlawng phorhnak tilawng 11 pinah, Navy nih ral kahnak tilawng 9 a hman chih fawn. Vanlawng hme deuh pawl an phorh khawh ve. Mah tilawng pawl nih cun US ralkap vanlawng thar bik ‘F-35B’ pawl an phorh hna. Marine Corps nih an hmanmi ral kahnak vanlawng pawl an si.

Hmanthlak: F-35B vanlawng

F-35B nih cun monghmi bomb 2 a phorh khawh i meng 500 hla tiang ral a do kho.

Destroyers le cruisers

Hmanthlak: ‘USS Curtis Wilbur’ tiin auhmi ral kahnak tilawng hi ‘Arleigh Burke-class’ asi i monghmi missile i phorh in ral a domi si

Duhnak paoh ah mongh khawhmi missile i phorh in ral doh aa thawhmi tilawng (destroyers) pawl cu US Navy nih a hmanmi an si ve i vanlawng phorhnak tilawng (aircraft carriers) pawl he i bawm in ral tuknak ah hman khawh an si. Amah lawng zongin hman khawh thiam asi.

‘Arleigh Burke-class’ phun pawl hi ‘destroyers’ an ti hna i US Navy nih 70 leng a ngeih. Tomahawk missile 56 cio an phorh khawh i rili le tlang um na ralpa kahnak caah hman khawh an si.

‘Ticonderoga-class’ phun tilawng pawl an um rih. Missiles an phorh khawh ve nain ‘destroyers’ tilawng pawl nakin tlawm deuh lawng an phorh khawh.

Mah tilawng phun 2 ahhin Navy missile system ttha bik ‘AEGIS’ an um. AEGIS system cu na target konglam tlaihnak caah hman asi i rili cungum na ralpa missile tilawng he tlang i na ralpa he kahnak caah hman khawh asi.

Charhchan: CNN

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...