US President nih Greenland ram cawk a duh, Denmark le Greenland an thin lin

- Advertisement -

US cozah nih Myanmar cozah sinah Chin state cawk tim sehlaw na duh hnga maw?

Atu hi US cozah nih Denmark cozah sinah Greenland ram cawk kong a ruah lio asi, tiah Wall Street Journal nih a tial.

Kum 1917 zongah US nih Denmark cozah sinah ‘Danish West Indies’ cu tangka $25 million in a rak cawk, hnu ah ‘United States Virgin Islands’ tiin min a thlen i nihin tiang cutin auh asi.

Atlantic le Arctic rili nih an kulhmi Greenland cu Denmark vawlei asi nain amah tein aa ukmi asi. Greenland ram hi a vawlei cu a ngan pah (836,000-square-mile asi) nain tikhal nih a khuh dih caah innlo le lam saknak hmun lawng zong a um huaha lo, minung 55,000 fai lawng an um.

US President Donald Trump nih Greenland ram cawknak kong cu amah ruahnak petu hna sinah a chim lengmang. White House rianttuan pawl zong cawknak kong khua a khan ter hna, tiah Wall Street Journal nih a phuan.

Hlan lio zongah US cozah nih Greenland ram hi cawk dingin khua a rak khan bal cang. Kum 1946 ah US President Harry Truman nih $100 million in cawk a rak timh nain Denmark nih a rak siang lo.

Mah hlan, kum 1867 zongah US Ramdang Vuanci Zung nih Greenland ram cawknak kong khua a rak khan len.

Zei ruang dah cawk a duh?

Hlan lio in nihin tiang ramkip cozah nih Atlantic le Artic rili kar ah a ummi Greenland hi rumnak le himnak caah hmun rem tuk asi, tiin an ruah cio.

Ralkap hmun rem – Greenland hi US Ralkap caah hmun rem tuk asi, tiin US cozah nih a ruah peng caah cawk a tumtah lengmangmi asi. Vawlei cunglei alaicer (North pole silole Kawl holh in Mioh-wun-yu-swe) he meng 1,000 lawng aa hlat caah missile warning peknak le space/van hlathlainak hmun rem tuk asi.

Mansung leitang chuak – khuati aa thlen bang kan vawlei a linh chin lengmang caah Greenland tikhal a ti thluahmah ve. Naite ah scientists pawl cu Greenland ah an va zuang i hlathlainak an tuah tikah hi ti ningin a tit peng ahcun tikhal tangah a ummi thil mansung zinaan hrim, sui, diamand, lead, zinc, copper le uranium pawl cawh khawh an si te lai an ti, tiah Forbes nih a ttial.

China nih a fuh caah – naite ah China cozah nih Greenland ah airport 3 saknak tangka bawmh a timh nain US cozah nih a kham. Nain, Trump nih cawk a duhmi hi US himternak caah asi/lo cu hngalh asi rih lo.

Chunglei thil sining a theimi nih Wall Street Journal ah an chim ning ahcun, naite i zaanriah an ei lio ah minung pakhat nih “Denmark nih kum fatin tangka $591 million peng Greenland a pekmi hi aa harh tuk cang, ati hnu ah Trump nih kan cawk lai ati. Mah hnu cun Trump nih amah ruahnak petu sinah cawknak kong a hal peng hna, ti asi.

Cun, Trump nih a lungtak tein cawk a duh/lo hngalh asi lo.

Atu hi Trump cu September thla thokka ah Denmark ram ah tlawn aa tim.

Greenland le Denmark cozah nih zei an ti?

Mah ca kan ttial lio tiang ahcun Greenland le Denmark cozah nih zeihmanh an chim rih lo. Nain, cozah chungtel MP tampi nih cun “asi kho lo tukmi hi Trump nih chim hlah seh, kan zuar naisai lai lo” an ti.

Ṭial Tharmi

Kalaymyo ah Quarantine lutmi minung 7 tazacuai an tong

Sagaing ramtthen, Kalaymyo ah Quarantine Center ah a lutmi minung 7 cu zuu an ding i sianginn kutka an hrawh caah ram...

Malaysia Covid-19 mizaw thar 95, a thimi 1

Tuni September 18 ah Malaysia ram ah Covid-19 mizaw 95 an hmuhchap hna i zawtnak ngei hmuhmi dihlak 10,147 an si cang.

Pastor Te Soiselnak Sawhsawh a Lo Nain | Salai Bawi Lian Mang

BIA KAA-KHAT | By Salai Bawi Lian Mang (Note: Mah ca hi 2005 May thla ah Lai Forum ah...

Nazareth Khua ah Minung 2 Meithal Kah in an Thi

Judah (Israel) ram Nazareth khua ah zahan zaan ah meithal kahnak a chuak i pa pahnih an thi, tiah Israel media pawl...
- Advertisement -