US President Biden nih “Myanmar thahnawnnak hi tuksapur asi” ati

US President Joe Biden nih, “Myanmar ralkap nih rammi mipi a thahmi hna hi tuksapur taktak asi,” ati i vawlei cung ramkip nih Myanmar ralkap mawhchiat cio dingin a sawm hna.

Zarhteni ahkhan Myanmar ralkap nih a hriamnaam le thazaang langhternak caah “Ralkap Ni (တပ်မတော်နေ့)” puai a tuah. Mah ni ah sandahpiahmi pawl cu ralkap le palek nih meithal in an kah thah thluahmah hna.

United Nations (UN) nih, “Kan theih khawh tawk ah Zarhteni lawng bakah minung 107 an kah thah hna. Ngakchia zong tampi an i tel,” tiah a thanh.

US President Biden nih, “Myanmar ralkap nih rammi mipi a thahmi hna kong thawng an ka thanhmi ka zoh tikah tuksapur taktak asi, thah hrim a herh lomi minung tam tuk remruam a thah hna, a tuahsernak hi fihnung tuksapur taktak asi,” ati.

Europe Ramkomh (EU) ramdang policy lutlai Josep Borrell nih, “Myanmar ralkap ni cu tuksapur le zahthlak ni asi,” tiah a chim ve.

US, Britain, Japan le ramdang 9 nih Myanmar ralkap thahnawnnak cu an mawhchiat hnu ah ramdang tampi zong nih an mawhchiat cio.

Ralkap nih February 1 ah uknak a fir thokin atutiang ah rammi 459 a thah cang hna, tiah Assistance Association for Political Prisoners (AAPP) nih a thanh.

Zarhteni ah a thahmi hna ruak vuinak an tuah cuahmah lio Zarhpini zongah minung 13 a thah ṭhan hna.

Zahthlak, Miralchia le Michiakha

Mah tluk ṭihnun bu cun mipi cu zalam cungah chuak in ni fatin sandah an piah peng.

Yangon sandahpiahtu cu ralkap nih kutcheh bomb (grenade) in an cheh hna caah kum 16 pate nih hlonh dingin a char i a kut tlau lakin a puah, tiah hliamtong zohkhenhtu nih a chim.

“Myanmar ralkap le palek nih a zaammi mipi meithal in an kah thah thluamah hna lio video kan hmuh. Ngakchia zong an thah hna. An thil tuah hi zahthlak, miralchia le michiakha tuahsernak asi. A rannak in an ngol hrimhrim herh,” tiah UN nih cathanh a chuah.

Myanmar ralkap thawngthanhnak Myawaddy TV nih cun “Zarhteni ah sandahpiahtu mipi nih ralkap le palek cu meithal le bomb in an ṭhuat hna caah ralkap le palek nih minung 45 an thah hna,” tiah lih le hrokhrawl in rammi sinah thawng a thanh.

Ram Daihnak Caah Ṭihnung

Karen state hriamtlai phu KNU nih, “Zarhteni ahkhan Myanmar ralkap he kan i kap i an sakhan kan chuh hna. Suimilam tlawmpal hnu ah ralkap nih vanlawng in a kan kah,” tiah a thanh.

Nuhrin covo aupitu Karen miphun Hsa Moo nih, “Myanmar ralkap vanlawng bomb nih minung 3 a thah hna, adang 8 hliam an tuar,” tiah a chim.

Kum 20 chungah avoi 1nak bik ralkap nih vanlawng bomb in KNU a kah si. KNU cu miphun hriamtlai phu lakah a nganbikmi si ve.

Zarhpini ah ralkap nih vanlawng in bomb a thlak ṭhan caah Karen mipi 3,000 leng cu Thailand ramri ramtang ah an zaam, tiah Karen Nu Bu nih a thanh.

Zarhteni Ralkap Ni puai ah, ralkap bawizik Min Aung Hlaing nih, “Ram daihnak le himnak caah ṭihnung a simi ralhrang tuahsernak cu kan cohlang kho lo,” tiah mipi ralrin a pek hna.

Rammi 100 leng a thah hna zaanlei ahcun, Russia Ralkap Vuanci Alexander Fomin cu lengah hlunghlai taktak in zaanriah dumnak le nuamhnak a tuahpi.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...