US President Joe Biden nih China ralchanh dingin Australia, India le Japan meeting a tuahpi hna lai. Biden nih avoi 1nak bik meeting a tuahpi hna si lai.
Na rel cang maw? US Chinmi $1,400 cio bawmhnak kan ngah lai (hmet)
Asia rili (Indo-Pacific) ah China a lor tuk cang caah atu bantukin China ralchanh dingin ram ṭhawngṭha 4 meeting tuah an timh hi si.
US President Zung (White House) nih, “hmai zarh ah President Joe Biden nih ram 3 hruaitu pawl he online meeting a tuah lai,” tiah a thanh.
Mah ram 4 hi 2007 ahkhan ṭangṭi dingin khua an rak khaang cang nain Australia le India nih ‘China a thin kan phawh sual lai’ ti an phan caah an ṭul.
President hlun Donald Trump nih ram 4 ṭanṭinak cu a nunter ṭhan. Australia cu hnulei aa thawnnak sau ngai cang nain India cu ramri kongah naite kha China he an i thahnawn caah hmai a nor chin lio asi.
Mah kong he pehtlai in China Ramdang Vuanci Wang Yi nih, “US nih ramdang he pehtlaihnak nai titer riangmang in na kutdong in kulh hme tete na ser,” tiah a mawhchiat.
October thla ahkhan US, India le Japan raltuk cawnnak tuah lio ah India nih Australia a sawm ve. Mah ram 4 hi 2007 hnu in avoi 1nak bik raltuk an cawnṭi asi. – India nih biatak tein China ralchanh le thlak a duh.
Japan rili kaupi zong China nih ‘keimah ta’ tiin a chuh caah Japan a thin lin tuk i biatak tein a cawlcang ve.
US zong nih China a ṭhawn tuk ding hi a ṭih tuk ve caah rialdit dingin China cozah a huami ram ṭhawngṭha 3 aa ruaih hna hi si.
