US President Joe Biden nih, “Keimah he ka nupi he avoi 3nak COVID-19 raikhamsi kan i chun lai,” tiah a chim.
“Hmai thla thok cun, US um kum tling vialte zong avoi 3nak an i chun kho dih cang lai,” ati.
Voi 4nak COVID-19 hrik aci aa thlengmi Delta Variant hi hmasa COVID-19 hrik nakin let tampi in i chawnh le thih a fawi deuh pinah raikhamsi nih a kham kho tuk lo.
Mah ruangah raikhamsi voi 2 aa chun cangmi pawl hi voi 3nk chunh hna ahcun Delta Variant nih a teih deuh hna lo ti asi.
President Biden nih, “Keimah he ka nupi he liamcia caan ahkhan tling tein COVID-19 raikhamsi kan i chun cang, nain kan i chunh cangmi kha ṭhawnter deuhnak caah voi 3nak kan i chun rih lai,” ati.
US President le a nupi cu tu kum thokka ahkhan raikhamsi voi 2 ning tein an rak i chun cang.
September 20 hrawng cun US um kum tling vialte ca zongah voi 3nk chunh awk raikhamsi a um cang lai.
Mah lak ahcun, Malaysia le Asia ram sifak deuh pawl cu raikhamsi tampi an ngeih lo caah voi 1 hmanh chunh rih lomi an tampi.
Thiamsang pawl nih Biden acozah soisel
Chawnh khawhmi zawtnak le pulrai lei thiamsang pawl nih, “COVID-19 raikhamsi voi 3nak chunh cu a ṭhami asi ko, nain US ti bantuk ram rum pawl nih raikhamsi tamtuk an cawk caah ram sifak pawl an tin huaha lomi hi apoi deuhmi asi,” an ti.
US le nitlaklei ram rum pawl nih COVID-19 raikhamsi a chuah hlan in tamtuk luakchuak an order caah ram sifak deuh pawl cu fawi le bai ah an ting lo. US bak lawng nih raikhamsi 1.3 billion a order. Mah zatzat raikhamsi cu US mipi vialte voi 6 cio an chunh khawh hna lai.
Raikhamsi company pawl nih a order hmasami ram kha an kuat hmasa hna caah ram sifak pawl cu fawi le bai ah an ting lo. Malaysia nih raikhamsi 87 million leng a order nain atutiang ah 34 million lawng an kuat khawh rih.
Phun dangin chim ahcun, raikhamsi company pawl nih sii an chuah chom in ram rum deuh a simi US le nitlaklei ram pawl nih an cawk dih caah ram sifak deuh pawl cu fawi le bai ah an ting lo.
US ram ah voi 3nak chunh nakin ram sifak deuh pawl ah voi 2 cio chunhter hmasa hna hi a biapi deuh.
Atu lio vawleipumpi khuacimui in a kan chiatu Delta Variant hi India ram ah COVID-19 hrik aci aa thlengmi asi.
US ram ah voi 3 cio raikhamsi i chun hmanh hna sehlaw, ram sifak pawl ah voi 2 cio tal an i chunh khawh lo ahcun kha ram pawl ah vantawng in zawtnak a karh lai i Delta Variant nakin ṭihnung deuhmi ci thar aa thleng ṭhan khomi asi, tiah thiamsang pawl nih ram sifak pawl usa pek hmasa an hauhnak kong le Biden khuakhan an lungtlinlonak kong an chim.
