US President Joe Biden nih, “Afghanistan ralzaam pawl $500 million kan bawmh hna lai,” tiah thawngthanh.
“US cozah lakhruak ralzaam bawmhnak budget zong kha hmang rih hlah uh. Afghanistan ram buainak ruangah a zaammi Afghanistan ralzaam pawl bawmhnak tampi an herhte kho men,” tiin nawl a chuah.
“Ramdang hartong bawmtu bu le cozah zung pawl nih Afghanistan ralzaam pawl bawmhnak caah an hman hau te lai,” ati.
Zarhpini ah Afghanistan tapung Taliban nih an ram an tuk lak i an president zong ramdang ah a zaam cang.
President Biden nih Afghanistan cozah ralkap bawmtu US ralkap pawl a lak cuahmah hna ruangah atu bantukin Taliban tapung nih an ram an lak hi asi. Afghanistan cozah ralkap cu an zaam dih.
Mah ruangah President Biden acozah nih Afghanistan ralzaam pawl biatak tein a bawmh hna hi si. Taliban tapung ṭih in a zaammi Afghanistan mipi zong US ralkap vanlawng in Qatar ram ah an zaampi hna.
President Biden nih Donald Trump sual a phawt
President Biden nih Afghanistan um US ralkap a lakmi hna cu President hlun Donald Trump nih a thokmi si (keimah palh asi lo), tiin Trump a mawhchiat.
“President hlun Donald Trump nih US ralkap pawl lak dih hna dingin Afghanistan cozah le Taliban tapung he sachoh a tuah i a lak cuahmahmi hna kha ka pehzulhmi asi.
“Donald Trump nih Afghanistan um US ralkap pawl a lak cuahmahmi hna hi ka pehzulh lo ahcun hmailei kum tampi chung kan ralkap pawl kan la kho hna lai lo i Taliban tapung an thin kan linhter chin hna lai i kan ṭhawnter chin hna lai,” ati.
US ralkap nan hnor ahcun a theipar kha taktak nan zun lai
Afghanistan um US ralkap pawl hi an la dih rih hna lo. Taliban tapung nih nizaan tihni ah an khualipi Kabul an lak hnu in US ralkap lak thlu lomi an him lo sual lai tiah a rannak in latu dingah ralkap thong tlawmpal an thlah chap hna i atu hi 3,000 hrawng an um rih.
President Biden nih, “US ralkap kan lak cuahmahmi hna hi Taliban tapung nih nan kah hna citcet ahcun nan ruah phak lo tiangin kan in lehrulh hna lai,” tiah ralrin a pek hna.
Atu hi Taliban tapung nih Kabul khuapi um President Zung le cozah zung vialte an lak dih cang nain Kabul khuapi ramdang kalnak vanlawngtual um US ralkap pawl cu zeitin hmanh an ti rih hna lo, an zoh sawh rih ko hna.
