US Nih Myanmar Ralkap le Palek Bawi 4 Rohingya Hrem Ruangah Chawleh A Kham Hna

US Nih Myanmar Ralkap le Palek Bawi 4 Rohingya Hrem Ruangah An Chawva A Kharpiak Hna

WASHINGTON: Myanmar ralkap le palek bawi 4 hna cu Rakhine, Kachin le Shan states hna ah ‘minung covo fak tukin nan buar’ i ‘minung tampi nan thah’ tiin US cozah nih dan a tat hna.

Ralkap le palek bawi; Aung Kyaw Zaw, Khin Maung Soe, Khin Hlaing le Thura San Lwin hna nih ralkap le palek pawl an hruai hna i Rohingya pawl an hrem, tlaihhrem, thah hna i inn an khanghpiak hna, tiah US cozah nih a ti.

“Pumpak in an chawva kan kharpiakmi hna hi, ‘ralkap le palek nih tlangcungmi le milu tlawm biaknak pawl harnak nan pekmi hna hi ngol ulaw an covo upat piak hna uh’ tiah ralrin peknak a si,” tiah US Department of Treasury nih a thanh.

Acunglei langhtermi Myanmar ralkap le palek bawi 4 hna cu ramdang ah chawlet kho ti lo dingin an kham hna pinah ramleng ah chawnva an ngeihmi vialte chuah/hman khawh lo dingin kharpiak dih an si.

Aung Kyaw Zaw cu, 2016 thokin Rohingya pawl harnak na pek peng hna caah minung 700,000 leng Bangladesh ram ah an zaam, tiin US cozah nih a thlir.

Khin Maung Soe cu, na kuttang minung pawl he August 27, 2017 ahkhan Maung Nu ah Rohingya pawl a runrun in nan rak thah hna, na minung pawl nih Rohingya pawl cu an velh hna, an tlaihhrem hna i an thah hna, tiin US cozah nih a phozar ve.

Thura San Lwin cu, ramri hngak palek bawi a si i, Rohingya pawl tlaihhremnak, velhnak le thahnak ah nawl petu a si ve, tiah US cozah nih a ti.

Khin Hlaing cu, November 2016 ahkhan Kachin le Shan states ah tlangcung hriamtlai pawl he nan rak i kah lio ahkhan na ralkap pawl luatnak caah khuami nan tlaih hna i meithal kuan khamnak phaw caah na hman hna, tiin US cozah nih a thlir ve.

“Vanchiat a tongmi hna le, ralkap le palek pawl sualnak a hlathlaitu hna thisen le temhtuarnak hi a lak in liamter awk si lo,” tiah US Tangka Zung in Mandelker nih a chim.

“Myanmar ramah minung covo a buartu pawl cu atu bantukin kan phozar hna lai i a theipar kan zunter peng hna lai. Minung covo buartu kong a hlathlaitu Myanmar ramchung zatlang bu le adang vialte nan cungah kan i lawm tuk,” tiah a chimchap. –AFP

Leave a Reply

Your email address will not be published. Required fields are marked *