14.7 C
Hakha
Wednesday, October 20, 2021
- Advertisement -

Ṭial Tharmi

US nih ‘Myanmar le US sipuaizi pehtlaihnak a phih’

“Myanmar ralkap nih mipi thimmi cozah sinah uknak a pek ṭhan hlan lo, 2013 US le Myanmar Sipuaizi Sachoh kha kan phih chung,” tiah US Ramdang Sipuaizi Pehtlaihnak Palai Pi Katherine Tai nih a chim.

2013 ahkhan US le Myanmar cu Trade and Investment Framework Agreement (TIFA) sachoh an rak tuah. “Myanmar ram a ṭhancho deuhnak hnga Myanmar le US kar chawlehnak ṭhat ter dingin ram 2 cozah biaruahnak kan ngei lengmang lai i remh a herhmi kan remh lengmang lai” timi asi.

Cucaah, US nih uknak firtu Myanmar ralkap cozah cu US he sipuaizi tuahnak kongah a tong ti lai lo i Myanmar chuak thil pawl US ah kuat/zuar a har chin lengmang lai caah Myanmar ram ṭhancho a har chin lengmang lai tinak asi.

Pi Katherine Tai

“Myanmar mipi nih nan thimmi cozah kha nan ram sipuaizi a remhtu le ṭhancho tertu asi. Myanmar mipi nih nan thimmi cozah sinah uknak kirter ṭhan dingin nan i zuammi hi US nih kan in dirkamh hna.

“Buai lo tein sandahpiahtu siangngakchia, rianṭuan le ngakchia pawl Myanmar ralkap le palek nih an thah thluahmahmi hna nih hin ramdang a kan lauter dih.

“Ralkap tuahsernak nih hin Myanmar ram democracy lei ah aa thlen cuahmahmi a hrawh pinah, Myanmar mipi nih hmailei ah ramdai le ram ṭhangcho ngah an i zuammi vialte zong a hrawh dih,” ati.

“Mah pinah, Global System of Preference (GSP) timi ram sifak Myanmar nih a ram chuak thil pawl fawi deuh in US ah a kuat/zuar khawhnak hnga tax tlawmte lawng kan lakmi le US ah sipuaizi tuahnak kutka kau deuh kan onpiakmi zong phih piak ṭhan dingin Hluttaw (Congress) ah biatung ka dirh lai,” ati.

Kum 1988 ah Myanmar ralkap nih sandahpiahtu rammi tampi a rak thah hna caah US nih Myanmar cu GSP in a chuah. 2016 ah Myanmar cozah (mipi thimmi) nih “rianṭuantu hna covo kan si khawh chungin kan upat piak ko hna …” tiin US cozah ca a kuat caah GSP ah a telh ṭhan.

Pi Tai nih, “GSP ah i tel khawhnak ding ahcun cozah nih a ram chung rianṭuantu hna covo a upat piak hna a hau. Myanmar ralkap nih sandahpiahtu rianṭuan pawl le rianṭuan bu pawl a tlerh, tukvelh i tlaih hna caah GSP in chuah dingin Hluttaw (Congress) ah ka chuahpi lai,” ati.

GSP zongin Myanmar an chuah ahcun, Myanmar ram thilchuak pawl US kuat/zuar tikah tax a tamtuk lai pinah nai hrawng kum bantukin US ah fawi tein sipuaizi tuah khawh asi ti lai lo caah Myanmar ram caah a poi ngaite lai.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -