Myanmar ram ah ralkap nih uknak a fir hnu in US nih a tlaihmi Myanmar cozah tangka $1 billion cu caan karlak dirhmi NUG cozah sinah pek dingin UN palai Kyaw Moe Tun nih a hal.
May 4 ah US Hluttaw Niam (House) i ramdang committee nih meeting a tuah lio ah U Kyaw Moe Tun nih online in a hal hna hi a si.
“NUG hi Myanmar cozah dik a si tiin kan cohlan piak uh. Cun, ralkap nih riankhinhmi zeibantuk palai hmanh US luhnak visa pe hna hlah uh (US luhter hna hlah uh). US ah a ummi Myanmar cozah tangka zong hi Myanmar ram mipi bawmhnak caah NUG cozah hmannak nawl pe uh” tiah U Kyaw Moe Tun nih a hal.
Cu pinah, U Kyaw Moe Tun nih US cozah nih ralkap i an tangka hmuhnak lam pawl phihpiak dingin a hal fawn.
Myanmar ralkap ngeihmi Myawaddy bank, Inwa bank, MFTB bank telhin an tangka hmuhnak hrampi simi zinan le gas company MOGE hi sipuazi phit hna uh ti zong a hal chih.
