Iran ralkap bawi Maj. Gen. Qassem Suleimani (acung hmanthlak) cu US President Donald Trump nawlpeknak in US ralkap nih an thah. Ningani ah a zultu ralkap 6 he Iran in Iraq an tlawn lio, Iraq khualipi Baghdad International Airport ah US Air Force nih drone in an kah hna i an 7 ningin an thi.
Maj. Gen. Qassem Suleimani cu Iran cozah ralkap ‘Islamic Revolutionary Guards Corps’ chungin ramdang raldotu phu ‘Quds Force’ hruaitu ralbawi ngan taktak asi.
Iraq le Syria raltuknak ah biatak tein aa teltum caah a ram Iran lawng si loin ramdang zongah a minthang ngaimi asi. Middle East ramkip ah Iran huham a ngeihtertu ralbawi asi.
Kum Thar ni ah Baghdad um US Tanzung mei duah dingin Iraq mipi a tukforhtu hna zong kha amah le a ralkap pawl (Iran cozah) an si, tiah President Trump nih a chim.
President Trump nih, “General Qassem Soleimani nih liamcia kum tlawmpal chungah Iraq le Syria ah ral a tumi American ralkap thong tampi a thah hna, adang thong tampi a hliamh hna. Adang tampi thah rih hna dingin khuakhannak a ngei.. nain kan paoh! Liamcia kum tampi lio hmanh khan rak hloh cang ding asi,” ati.
Iran cozah nih fak taktak in US ka lehrulh lai ati
Maj. Gen. Qassem Suleimani thah a ton cangka in Iran cozah hruaitu pawl nih, US cu fak taktak in kan lehrulh lai, tiin an i hrocer colh.
Iran cozah lubik (supreme leader) Ayatollah Ali Khamenei nih kan ralbawi a thimi ngaihchiatpinak cu rampumpi ah ni 3 chung kan tuah lai, US cu fak taktak in kan lehrulh lai, ati.
Iran security body zong nih ‘hmun rem le caan rem kan hmuh cangka in US cu kan lehrulh lai,” ati ve.
Tutan ah Iran ralbawi an thahmi hi US nih 2003 ah Iraq a tuk hnu in Middle East ah thil a tuahmi vialte lakah ṭihnung bik asi, Middle East um US le a ṭanṭi ralkap pawl a thar in ral nih tukdoh an tong ṭhan lai, a timi zong an tampi.
Republicans pawl nih cun Trump an thangṭhat ngai nain, Democratic MP/congressmen pawl nih cun an soisel taktak ve. Tu kum ah US President Thimnak a um ding si caah Donald Trump nih American ralkap nunnak thap in vote kawlnak a tuah bia si, an ti.
Media cheukhat nih cun Iran ralbawi thihnak kong cu “US nih vawlei cung misual bik pa a thah” ti tlangtar in an ṭial ve len.
Charhchan: New York Times, Al Jazeera
