US Nih A Tlaihmi Phungninglo Ramdangmi 1,600 Bak Misual Chiahnak Thonginnpi Ah Chiah A Timh Hna

US Nih A Tlaihmi Phungninglo Ramdangmi 1,600 Bak Misual Chiahnak Thonginnpi Ah Chiah A Timh Hna
  • Phungninglo in luh ruangah tlaihmi cu thonginn ah chiah loin Lahwahkah Mihrennak (ramdangmi lawng chiahnak) ah chiah an si tawn
  • Thonginn (prison) ahcun upadi fak a buarmi deuh lawng an chiah hna i a tam deuh cu misual pawl an si

WASHINGTON: US ah phungninglo in an luh ruangah Lahwahkah nih a tlaihmi ramdangmi 1,600 hna cu misual chiahnak thonginnpi (federal prison) ah chiah an timh hna caah mi tampi an lau ko.

US ah phungninglo in luh ruangah Lahwahkah nih a tlaihmi hna cu Lahwahkah Mihrennak (Immigration’s Detention Centers/Camps) le khua/peng thonginnte (jail) deuh ah an chiah tawn hna.

A caancaan ahcun federal thonginn ah an chiah ve ko hna nain hi zatzat hi an chia bal hna lo. Federal prison ahcun sualnak fakpi a tuahmi le caan saupi thong a tla ding (misual) pawl deuh an chiah hna.

“US ah maw kan umter lai, a ram dah kan khirh lai tiin biaceih zungah chuahpi ding pawl cu biaceih zung nih bia a chah hlan chung paoh thonginnpi 5 ah kan chiah hna lai. California state i Victorville khua ah a ummi thonginnpi ah minung 1,000 kan chiah hna lai, adang 600 cu Washington state, Oregon, Arizona le Texas thonginn 4 ah kan chiah hna lai,” tiah Lahwahkah biachimtu nih Reuters thawngzamhca ah a chim.

US President Donald Trump cu phungninglo ramdangmi a hua taktakmi a si bang amah kai hnu in US ramri le ram chung hmun kip ah lahwahkah nih phungninglo minung thong sawm tampi an tlaih cang hna.

Canada nih cun phungninglo i a rung lutmi pawl cu ramri ah an hmuh hna zongah tlaih loin an bawmh hna an ram chungah an luhpi hna.

“Phungninglo in kan ram a lutmi pawl cu an ramah kuat dingin biaceih zung nih bia a khiah hlan chung paoh kan hren (thongthlak) viar hna lai…” tiah Trump nih a rak chim tawn ṭheo.

US ah phungninglo in luh ruang te hna hi minung 1,600 bak thonginnpi ah chiah hna ding cu a lungtling lomi an tam ngai. Abikin, mipeem/ralzaam bawmtu le hmasa acozah rianṭuan pawl hrim nih cun an lungtlin lonak an chim len.

Obama acozah lio ah Lahwahkah Mihrennak phungphai lei lutlai changtu a rak simi Kevin Landy nih, “phungninglo in rat ruangah tlaihmi hi zatzat bak federal thonginnpi ah chiah cu a um bal lo, thil thar a si caah thinphan awk a um ngai,” tiah a chim.

“Phungninglo ramdangmi pawl lakah acheu fai cu liamcia caan ah upadi a rak buar bal lomi deuh an si hna. Thonginnpi ah chiah hna ahcun thongtlami dang pawl nih an neek ngai hna lai i an teem ngaite lai. Thonginnpi ah chiahmi minung pawl hi cu sualnak ngan a tuahmi misual pawl deuh an si hna. Hi zatzat minung bak thonginnpi ah an chiah hna ahcun thonginn ah thil poipang a chuak len te kho men, thonginn zohkhenh zong a har ngaite lai,” tiah Thonginnpi Runvennak Zung (BOP) rianṭuan pakhat nih a chim.

“Phungninglo in luh ruang te lawngah tlaihmi minung hi zatzat bak misual chiahnak thonginnpi ah chiah ding cu thonginn rianṭuan pawl zong kan lau ngai, kan i ceih len ko,” tiah thonginn rianṭuan pakhat nih a chim.

“Minung 1,600 leng bak thonginnpi ah chiah ding cu timhtuah caan zong kan ngei lo, thil poipang a chuak sualte lai ti ka phang ko,” tiah California, Texas le Washington thonginnpi zohkhenhtu pawl nih an chim ve.

“Lahwahkah Mihrennak Hmun ah phungninglo ramdangmi an i tlum ti lo caah thonginnpi ah  tlawmpal chiah an timh hna hi si,” tiah Lahwahkah biachimtu Dani Bennett nih a chim.

April 2018 chung lawngah Lahwahkah nih ramdangmi 51,000 hrawng bak US ram thlanglei ramri ah a tlaih hna. Nikum April thla ahcun minung 16,000 lawng a rak tlaih hna (nikum cu an rak strict tuk lo).

Atu bantukin thonginnpi ah ramdangmi 1,600 chiah a timhmi hna hi thla 4 (ni 120) chung chiah dingin timhmi a si nain tinh ningin thil a kal theng lai lo caah mah nak sau deuhpi chiah an tongte kho men.

Liamcia acozah lio ahcun phungninglo in US a lutmi pawl cu ramri ah an tlaih khawh hna hmanh ah Lahwahkah mihrennak ah ni tlawmpal an chiah hna i an thlah ṭhan colh hna i biaceih zung nih US ah umnak nawl asiloah an ramah khirh dingin bia a khiah hlan chung vialte US ram chungah zalong tein an um (phungning an si lo buin).

“Tlaih in thlah ṭhan” phungphai kha um ti hlah seh timi upadi cu nikum ah Preisdent Trump nih minsen a thut caah atu cu an tlaihmi hna vialte pakhat hmanh an thlah ti hna lo. Biaceih zung nih US ah umnak nawl asiloah an ramah khirh dingin bia a khiah hlan chung vialte hren peng an si cang.

Nikum ahcun Lahwahkah Mihrennak (detention centers) ah buaktlakin ni fatin mithar an chiahmi hna hi ni khat ah minung 38,106 lawng an rak si nain tu kum May 26 tiang ahcun ni fatin buaktlakin minung 41,134 peng an chiah hna.

| Reuters, The New York Post, CNN

Leave a Reply

Your email address will not be published. Required fields are marked *