US le a ṭanṭi ram France le Britain nih missile zun 100 leng in Syria an kah, tam lakte Syria ralkap nih an kah thlak tiah Russia Ralkap Vuanci Zung nih a chim.

“Syria ralkap nih US le a hawile missile tleutleu an kah thlaknak vanzuang bom pawl cu liamcia kum 30 lio ah Russia ramah rak sermi an si. Mah tluk a hlun cangmi nih cun fawi tein a kah thlak khawh hna,” tiah Russia nih siarhleih in a chim.

“US le a hawile pawl nih an kah lenmi missiles tleutleu pawl cu Syria ram chung i Russia Ralkap an umnak hmun Hmeimim le Tartus ah zun 1 te hmanh a tla kho lo,” tiah a chimchap.

Red Sea cungah a ummi US Ralkap tilawng le Mediterranean Rili cungah a zuangmi US, France le Britain ralkap vanlawng pawl in missiles cu an kah tiah theih a si.

Syria cozah media le ramdang media pawl nih an thanh ning ahcun – US, France le Britain nih Zarhte zinglei khuadei hlan 4am hrawngah missile zun tampi in Syria an kah i tam lakte Syria ralkap nih an kah thlak ko nain an kah thlak lomi tam lakte a um ve ti a si.

US le a hawile pawl nih an khennak hmun pawl cu Syria ralkap scientists pawl nih chemical hriamnam an sernak, an chiahnak le thilri an fimnak hmun, le Syria ralkap sakhan pawl an si.

Syria khualipi Damascus le pawngkam khua pawl ah US le a hawile missile zun tampi nih hmun tampi a khen i an puah thluahmahmi cu pawngkam minung nih an hmuh cio.

Kan hnu zarh ahkhan Syria cozah nih chemical hriamnam in a rammi a kah hna i minung 40 leng an thi, a dang tampi an zaw.

Chemical hriamnam cu hman lo dingin UN nih a khammi si caah atu bantukin US le a hawile nih Syria cozah ralkap le chemical hriamnam an chiahnak hmun pawl an kahnak hi a si.

Ni kum zongah Syria cozah nih chemical hriamnam in a rammi a rak kah hna i minung tampi an rak thi. Mah ruangah US nih missile zun 58 nih Syria ralkap sakhan le chemical hriamnam an chiahnak hmun pawl cu puak dihlak in a rak kah cang hna. Mah lio ahcun Syria nih US missiles pawl cu an rak kap lo.

| AFP, CNN le Fox News

Zeitin na ruah?

Zaangfah na comment ṭial!
Zaangfah tein ka hin a min ṭial