US ram Texas state khuasa Laimi 2 le an hawi minak pa nih kum 13 ngakchia damiah an ṭaih i meithal in an kah, tiah Collin County palik nih thawng an thanh.
Bawi Bik, Cung Hup le an hawi minak pa Zenzele Dube nih August 24 ah kum 13 ngakchia cu Melissa khua pawng Covey Lane 300 block ah damiah an ṭaih i an ṭaih khawh lo caah meithal in voi 2 an kah hnu ah an zaam tak.
Palik nih zarh 1 chung an kawl hna i nizaan ah an tlaih khawh hna.
Palik nih ngakchia cu a rannak in a hma an reh i a thi an pihter hnu ah sizung ah an kuat. Atu cu sizung in a chuak cang.
Cung Hup, Bawi Bik le Zenzele Dube cu sualnak upadi phun 3:
- Hriamnam hmangin damiah ṭaih,
- Ngakchia hliamh le
- Timh ciammaam tein mibu in sualnak tuah (gangster phu cawlcanghnak tuah) case in taza an cuai hna.
Taza an cuainak hna upadi phun 3 hi a fak bikmi dantatnak (first degree felony) lawngte an si.
US Chin mino hi misual phu (gang/mafia) ah aa telmi an tam ngai caah hmailei ah Chin miphun min chiat tertu le US ah Chinmi phaknak lam bit tertu an si te kho.
Cung Hup le Bawi Bik cu Denton County Thong ah an thlak hna. Dube cu Collin County Detention Facility ah an hren. Biaceihzung nih bia a khiah hlan ah kan zaam lai lo tiin amahkhan in chuah chung an duh ahcun $450,000 amahkhan piak an hau.
Collin County Palik Bawi Changtu Nick Bristow nih, “Ngakchia cu sizung in a chuak cang,” tiah nizaan ah media sinah a chim.
“Ka ṭuanhawi palik pawl nih Lewisville Khua Palik Sakhan le Lahwahkah (DHS) he i bawm in teirial taktak in an kawl hna hnu ah misual pawl an tlaih khawh hna hi si.
“Mah kum 13 ngakchia te damiah a ṭaih i meithal in a kaptu misual pawl tlaih khawhnak dingah fak piin aa zuammi ka ṭuanhawi palik pawl cungah kai lawm tuk,” tiah Collin County Palik Bawi Jim Skinner nih a chim ve.
