Wednesday, December 1, 2021

US Hluttaw ah thahnawnnak chuak: Palek 1 thah tong, 1 hliamtuar

Tuni ah, US Rampumpi Hluttaw (Capitol) chaklei kutka congtu Hluttaw palek pawl cu mipa nih mawṭaw in a pah hna caah palek 1 a thi, adang 1 hliamtuar.

Misual pa cu mawṭaw in a chuak i namte in palek a zuanh hna lio ah palek nih meithal in an kah i a thi.

Thah a tongmi Hluttaw palek pa cu kum 18 chung palek a ṭuan cangmi William “Billy” Evans asi, tiah palek bawi Yogananda Pittman nih a chim.

A nunnak liammi palek Evans

Misual pa nih mawṭaw in a pah caah hliam a tuar i tlawmpal ah a nunnak liam. Hliam a tuarmi palek pakhat cu a hma fak tuk lo i a nunnak caah thinphang si lo.

US Hluttaw/Congress hruaitu Pi Nancy Pelosi nih, “A nunnak liammi palek Evans cu kan ram democracy caah a nunnak aa pe,” tiah a chim.

Misual pa cu Indiana state khuasa Noah Green, kum 25 asi.

Zei ruang dah Hluttaw ah thahnawnnak a tuah ti cu palek nih an hngal rih lo nain atutiang kan hlat khawh tawk ahcun “ralhrang he aa pehtlaimi si lai lo” tiin kan zumh, tiah Washington D.C palek sakhan nih a thanh.

Misual pa mawtaw

Noah Green nih cun a Facebook ah “Nation of Islam (Muslim) zumtu ka si” tiin a langhter. Cun, pulrai ruangah liamcia thla tlawmpal chung ka harsa ngai, ti zong a langhter. A account cu Facebook nih a thahpiak cang.

January 6 ah Trump ṭanhtu pawl nih Hluttaw ah thahnawnnak an tuah i minung 5 nunnak a liam i adang tampi hliam an tuar hnu in, tutan hi Hluttaw ah ṭihnungbik thil a can si.

January 6 hnu in Hluttaw cu palek tam taktak nih an congh peng. Tuni thahnawnnak a um cangka in National Guard ralkap le palek tam chinchin an chiah chap hna.

Helicopter in an zuan hnawh lio

President Biden nih, “A nunnak liammi palek Evans upat peknak caah president zung White House i US thantar cu thantar-tung tanṭim ah thlai uh” tiin nawl a chuah. Pi Pelosi zong nih Hluttaw i US thantar cu mah bantukin thlai dingin nawl a chuah ve.

US nunphung ahcun, US cozah rianṭuan an thih tikah upat peknak caah US thantar (flag) kha voi dang bantukin thantar tung par ah tar loin a tanṭim ah an tar tawn.

President Biden cu thawhṭhan lai asi caah thazaang thar la dingin president dinhnak hmun Camp David ah a um lio si.

“US Hluttaw kutka hram ah thahnawnnak a chuahmi le palek Evans a thihmi le a ṭuanhawi hliam a tuarmi thawngpang kan theih cu kan nu he kan lungrawk tuk hringhran. Evans a chungkhar an ngaihchiatnak kan hrawmpi hna. Hluttaw palai vialte le Hluttaw vengtu vialte ca zongah thinlung re a thei tuk lai,” tiah a ngaihchiatnak kong a chim.

Nai hrawng cu, Republican MP (representative le senator) cheukhat nih “Hluttaw thahnawnnak um ti lo caah palek le ralkap tlawm deuh lawng chiah cang ding an si” an ti len nain tuni ah thahnawnnak a chuak than ai.

Liamcia ni tlawmpal ahkhan, Hluttaw sang (Senate) ah Republican hruaitu a simi Mitch McConnell cu, “Hluttaw vengtu dingah palek le ralkap mah zatzat nan chiah pengmi hna hi ka thinlung rethei, kum 2015 ah a donghnak bik Kabul (Afghanistan khualipi) ka tlawn lio kaa thei peng” tiah Hluttaw ah palek le ralkap tamtuk chiah a duh lonak kong a zai.

- Advertisement -