US Hluttaw ah buainak chuahpimi Trump tanhtu pakhat cu kum 5 thong an thlak

- Advertisement -

US President hlun Donald Trump ṭanhtu pawl nih ‘2020 Thimnak ah mee nan fir…Trump a sung lo…” tiin 2021 January 6 ah US Hluttaw (Capitol) ah buainak an chuahpi i minung 5 nunnak a liam.

Mah lio ah aa tel vemi Trump ṭanhtu pakhat (Florida state in Washington DC ah a rami pa) cu tuni ah biaceihzung nih kum 5 leng (thla 63) bak thong a thlak – Trump a ṭanhmi cu a phu lo ngai.

2020 Thimnnak ah Trump a sunghmi le Biden nih a teimi cu fehter dingin 2021 January 6 ah US Hluttaw ah MP/Congressmen/women pawl meṭing an tuah. Mah ni ahcun Trump nih Washington DC ah a ṭanhtu pawl sandah a piahpi hna i bia zong a chim. “Mee an fir, kan kham hna a herh…” ati. Bia a chim dih cangka in a ṭanhtu thong tampi cu Hluttaw ah an va kal i Trump sungh fehter kho lo dingin an va buai hnawh hna i minung 5 nunnak a liam. Hluttaw meting zong pehzulh kho loin palai vialte thinphang thlalau in an zaam dih — mah ruangah Trump cu buainak chuahtertu asi tiin Facebook, Twitter le Youtube nih an kham i atutiang online ah a lang kho ti lo.

Buainak ah aa telmi Trump ṭanhtu thong tampi lakah a zaza cu taza an cuai cang hna i 150 leng nih ‘kan palh ko’ tiin an i cohlan. A palh aa cohlangmi 150 leng chung ahcun tutan Florida pa hi atutiang ah caan saubik thong an thlakmi asi.

US District Biaceihtu Tanya S. Chutkan nih, “Buaibainak in cozah pawnchuah timh, tluang tein uknak i pek khawh lo dingin kham timh le palik pawl tukvelh a hmangmi cu fak piin hma lak an si timi hi mipi nih an i fian a herh,” tiah kum 5 thongthlak dingin bia a khiahnak aruang cu a chim.

Kum 5 thong an thlakmi Trump ṭanhtu pa cu Florida state, Tampa khuami Robert Palmer, kum 54 asi.

“Hluttaw (Capitol) nitlaklei inntual ah a pehpeh in palik pawl na kutke in na velh hna; dur le thingtan in palik na cheh hna, cun meithahnak gas in palik na kah hna, a dur in na cheh chap rih hna,” tiin taza an cuai i kum 5 thong an thlak hi si.

“Minute tlawmpal hnu ah, meithahnak gas dur aa lak i avoi 2nk a cheh hna. Thir thluan zongin palik pawl a ṭhuat hna, fei bantukin a khawhnak hna. Palik pakhat nih a paw ah khairiat meithal kuan in a kah hnu ceo ah a ngol,” tiin tazacuaitu cozah sihni pawl nih an chim.

Trump ṭanhtu Robert Palmer nih cun, “Kha tlukin kan buaimi le kan bia chiakha le bia dawhcah lomi vialte i in in palik nih an kan khammi kha ka thangṭhat tuk hna, an ral ṭha tuk hringhran.

“Kha bantuk mi buai lakah kai tel vemi cu ka ningzak tuk hringhran. Ka ning zaktuk hringhran,” tiah aa ngaichihnak kong a chim.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...