Myanmar buainak kong ceih dingin US Ramdang Vuanci Zung rianṭuan, ramdang ṭhanchonak zung le zung dangdang rianṭuan pawl cu Thailand, Singapore le Indonesia ram ah hmai zarh ah an ra lai, tiah US cozah nih a thanh.
“US cozah palai phu cu US Ramdang Vuanci Pu Antony Blinken ruahnak petu Derek Chollet nih a hruai hna lai. An kir pah in Japan ram zongah an tang pah te lai.
“Zarhpini in hmai zarh Ningani tiang acunglei langhtermi Southeast Asia ram pawl ahcun an tlawng lai.
“US a ṭanṭi ram pawl he rianṭuan ṭi dingin le pawngkam daihnak caah ASEAN nih a rian ṭhawng deuh in ṭuan dingin an forhfial hna lai,” tiah US Ramdang Vuanci Zung nih a thanh.
“Myanmar kong he pehtlai in, US nih Myanmar mipi a dirkamhnak hna kong fianghlang tein an chimh hna lai.
“Cun, innpa ram pawl le ramdang vialte nih Myanmar ralkap hi raltuk ngol ding, ramkhel ruang a tlaihmi vialte thlah ding le Myanmar ram democracy lamthluan lei panhter ṭhan dingin hnek cio a biapit tuknak kong an ceihpi hna lai.
“Thailand cozah sin ahcun, ramri um hartong Myanmar ralzaam pawl tirawl bawmhnak kong zong an chim lai,” ati.
