US cozah nih ‘US Tanzung rianṭuan pawl’ cu Myanmar chuahtak dingin nawl a pek hna

- Advertisement -

Uknak firtu Myanmar ralkap nih sandahpiahtu mipi a thahnawnmi hna a zual chin lengmang caah, US cozah nih Yangon um US Tanzung rianṭuan pawl cu Myanmar ram chuahtak dingin nawl a pek hna.

Myanmar ralkap nih February 1 ah uknak a fir thok in atutiang ah sandahpiahtu mipi 520 leng a thah cang hna. Ralkap tuahsernak cu ramdang tampi nih an mawhchiat. Miphun hriamtlai phu pawl nih “lehrulh dingin” ralkap cu an tlerh ve.

US Ramdang Vuanci Zung nih, “A herh tuk lomi US Tanzung rianṭuan pawl le an chungkhar vialte cu Myanmar ram chuaktak dingin nawl kan pek dih hna. Um hrimhrim a herhmi tlawmte lawng kan nganh hna,” tiah a thanh.

“US Tanzung rianṭuan pawl le an chungkhar minung pawl an him sual lai lo ti kan phan caah Myanmar chuahtak dingin nawl kan pekmi hna hi si,” ati.

March 27 ahkhan, Yangon um US Tanzung tlaihmi American Center cu meithal zun tam ngai in an kah. Hliam tongmi cu an um lo.

Vawlei cung ram ṭhawngṭha pawl nih Myanmar ralkap tuksapur thahnawnnak cu an mawhchiat cio nain Myanmar ralkap bawi pawl cu an zeihmanh poi hlei lo. Myanmar Ralkap Ni puai an tuah lio Zarhteni lebang ahcun minung 107 leng an thah hna.

Vawlei daihnak le himnak ṭuanvo latu bu United Nations Security Council (UNSC) nih tuni hi Myanmar kong lakhruak meeting a tuah ṭhan lai. UNSC member ram 15 cu media luhter lo kutka kharkhumh in meeting an tuah lai. Meeting thokka ah Myanmar kong UN thawngla Christine Schraner Burgener nih Myanmar boruak kong a chim lai.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...