US Senate nih $1,400 Cio Bawmh Dingin a Fehter Cang

Tu zingka ah US Hluttaw Sang (Senate) nih $1.9 trillion coronavirus bawmhnak upadi a fehter cang. Mah chungah, income tlawm American pawl $1,400 cio bawmh ding timi zong aa tel.

Senate nih a fehtermi hi Hluttaw Niam (House) nih a fehtermi he tlawmte aa dan deuh caah hmai zarh thokka ah House ah an kuat ṭhan lai i House nih a fehter ṭhan ve lai. Mah hnu ah President Biden nih minsen a thut colh lai.

Hmai zarh dongh silole zarh chin thokka hrawng cun IRS nih nan bank account ah an rawnpiak thluahmah cang hna lai.

Income Rikhiahmi

Single paoh cu $1,400 cio le nuva $2,800 bawmh ding ti asi nain income rikhiah asi.

Kum 1 chungah income $75,000 tang a hmumi single lawng nih $1,400 tling tein nan ngah lai. $150,000 tang a hmumi nuva lawng nih $2,800 tling tein nan ngah lai.

US um Chinmi tam deuh cu kan income a tlawm caah kan ngah dih lai tinak asi.

Mah cung a hmumi paoh cu bawmhnak a tlawm deuh thluahmah lai.

$80,000 cung a hmumi single cu fang 1 hmanh nan ngah lai lo. $160,000 cung a hmumi nuva zong fang 1 hmanh nan ngah lai lo.

Hmasa i House nih a rak fehter lio ahcun single $100,000 a hmumi le nuva $200,000 cung a hmumi cu bawmh lo ding an ti nain Senate nih atu bantukin a rengh deuh hi si.

$1,400 bawmhnak tangka hi American mipi 23 million hrawng nih an ngah lai, tiah ruahdamh asi.

US ummi pawl cu tutan he cun voi 3 bak coronavirus bawmhnak tangka kan ngah cang lai tinak asi.

Pulrai ruangah mipi rian a ṭuan lomi an tamtuk i an har tuk sual lai tiin cozah nih “coronavirus bawmhnak tangka” a pek hna hi si.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...