Texas state, USA — Zahan ah Denton county um Chin mino kum tlinglo 3 cu hngakchia biaceihzung ah bia an ceih hna. Ni khat ah minung pathum bia ceih hi avoi hnihnak a tam bik ka theih ni asi.
An case cu ritsii tha lo taksa pum cungah hmuh le mawtawka teih i zam diam timi a-hmuh pawl an si. Tuzarh Nilini ah kum tling lo Chin mino 2 biaceih ding an um rih —an case kong cu ka thei lo.
Denton county milu zoh tikah a tlawm taktakmi miphun pakhat nih thla khat ah kum tlinglo minung 3 hrawnghrang sualnak tuah ruang ah tlaihkhih ton hi khuaruah ngai a hau. Tlaih khawhmi hmanh mah hrawng an si ahcun palik nih theih lomi misual an tam lai maw ti cu Ph.D (Dr.) ngah hau lo, fawi tein tuak khawh a si ko.
Kum tlinglo tete tlaihkhih an tonmi hmuh tikah lung a tha lo. Hmailei a kan hruaitu ding le zohthla mi tiin chim tawnmi kan mino tete thonginn angki le bawngbi he hmuh tikah an nu le pa cu chim lo a hmutu paoh lung a tha lo.
Innchungkhar in Khrihfabu in Community in pumpak in kan sining taktak i check than kan hau. Zeiruang ah kan hmailei hruaitu asi ding tiin kan zohmi kan mino cheukhat thonginn ah an phanh hnga timi hi ruah awk ngai a si.
Innchungkhar lei nih ruah awk pakhat ah ka ruahmi cu: Kan fapa/nu hi inn ah aa nuam maw?Zeidah bawmh a herh?
Khrihfabu lei nih ruah awk ah ka ruahmi cu: Kum 18 tang kan mino caah misual pawl he an i komh lonak ding caah thla lawng maw kan cam rih lai, phung lawng maw kan chim rih lai, mah pawl lawng siloin an i nuamhnak le mi sual pawl kiang an phanh lonak caah sianginn kai hnu le Zarhte/pi tibantuk ah nuamhnak cawlcanhnak activities pawl tuah piak hna ah a tha lo maw?
Community lei nih ruah awk a tha ka timi cu: Ziah mithi um caan le CND day lawng khin maw hmunkhat te ah kan tan ti lai, thazaang kan chuahti lai?
Pumpak cio ruah awk ah: Kan kiangkam um minung an nunnak ah tlawmpal te tal a nuamhter deuhtu le a thatter deuhtu kan si kho ve lo maw?
Caṭialtu: Salai Z T Lian
