US Chin company Yoshi nih Chinram dothlennak caah $50,000 a hlut

- Advertisement -

US ram i Chin company nganbik a simi Yo-Health (Yoshi) nih Chinram dothlennak caah $50,000 (Kawlram ting thong 1 dengmang) a hlut.

Chinram dothlennak caah a biapi bikmi drone cawknak caah $40,000 le hliam tong Chin ralkap hna thlopnak caah $10,000 tiin a dihlak $50,000 a hlut hi si.

$50,000 cu Vaurawng Zuunthil phu sinah an pek cang.

Chinmi dirhmi Yo-Health company cu zei dah asi?

Rawldawr company asi: Yo-Health company cu rawldawr company asi. US ram state cheukhat ah Japan rawl sushi dawr le yogurt din awk an tuah. A rauh hlan ah changreu (cake le pastries) zong tuah chih an timh.

An dirhnak kum 1 hrawng asi cang i ni kum kha an tangka lut $2.8 million asi. Tu kum 2022 cu $10 million hmuh khawh dingin an i zuam cuahmah.

Indiana le New York state ah rawl sernak sehzung (factory) zong tuah an timh.

US ram ah Chin mipi ngeihmi company hmasa bik asi lai: US rampumpi ah rawldawr le changreu dawr tampi on thluahmah an duh. Cu tuahnak ding ahcun tangka tampi an herh caah mipi nih an sinah tangka thawh i a theipar zun ve (invest) khawh dingin ‘mipi company (public company)’ ah thlen an i zuam cuahmah liopi asi.

Yo-Health company theipar zun ve dingin US um Chinmi 500 leng nih $5,000 silole $10,000 ti bantukin tangka an thawh cang (pre-IPO share an cawk cang). Pre-IPO share cawk a duhmi paoh nih company hruaitu pawl sinah cawk khawh asi rih.

April thla cun mipi company ah thlen (IPO ah kal) dingin US cozah sinah an sok cang lai.

Yo-Health CEO Peter Thawnghmung nih, “Tu kum September thla dongh hlan ahcun mipi company (IPO) ah kan thlen khawh lai ti kan zumh,” tiah a chim.

“Yo-Health company cu US ram ah Chin mipi nih ngeih hmasa bikmi multi-million dollar company asi te lai,” ati.

Nihin tiangah, US ram ah million tampi man Chin mipi company pakhat hmanh a um rih lo. A tuah zong an tuah bal lo. Tutan hi avoi 1bik tuah an timh asi.

Yo-Health company pre-IPO share cu na cawk awk si maw?

Hi cu hohmanh nih leh khawh asi lo pinah leh phung zong asi lo. Na tangka kong ahcun thil sining na hlat hnu ah nangmah tein biachahnak tuah a hau.

Pre-IPO share cawk hi a miak tuk khomi le chikhat te ah mirum tumtlang taktak ah i chuah khawhnak asi bantukin sungh khawh zong asi ve.

CEO Peter Thawnghmung nih, “IPO kan kal hlan (mipi company ah kan thlen hlan) ah kan sinah a invest mi cu IPO kan kal hnu ahcun nan duh tik paoh ah nan share nan zuar lai i nan thawhmi tangka theipar cu nan zun/chuah ko lai,” ati.

“IPO ah kan kal kho lai ti cu kan zumh tuk ko, nain kal kho lo sual hmanh usih law atu lio kan dawr vialte hi kan zuar lai i invest a tuahmi pawl cu pek an si ko lai,” ati.

Tam deuh theih a duhmi nih atang VIDEO hi zoh khawh asi.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...