US, Australia, Canada le UK cozah nih, “China ram ah tuah dingmi Olympics lentecelh zuamnak puai ah kan kal lai lo…,” tiin duhlonak an langhter.
A ra laimi February thla ahhin China ram ah ‘Ṭhal Caan Lentecelh Zuamnak’ ti zongin auhmi Olympics puai tuah ding asi.
“China ram ah a ummi muslim pawl, China cozah nih a hrem tuk hna… an nuhrin covo a buarpiak hna…” tiin acunglei ram 4 cozah nih China Olympics puai kan zawh/kal lai lo tiin duhlonak an langhter hi si.
China nih, “A nanmah pawl hi i zoh ko uh, nan tuhmi theipar chiakha taktak kan zunter hna lai…,” tiin a tlerh hna.
US President zung White House nih, “China cozah nih milu tlawm a simi muslim pawl a hrem tuk hna caah US cozah cu China ram ah tuah ding Olympics lentecelh zuamnak puai ah kan kal lai lo,” tiah a fehter ve.
US, Australia, Canada le UK cozah nih China Olympics zawh lo an i timhmi nihhin an rammi cu a dawn hna lo. An duh cun an vai i zuam ko lai.
Cozah lawng kal lo an i timhmi asi, ramkhel lei lawngin duhlonak an langhtermi asi. US, Australia, Canada le UK mipi cu an duh ahcun an vai i zuam kho ko.
Kum 2018 ah Canada nih Huawei company tangka lutlai Meng Wanzhou a tlaih hnu in China cozah he an i hua ngai. Mah ruangah China nih a ram um Canada rammi tampi a tlaih ve hna (a lehrulh) i Canada mipi China cozah cu an huat ngai.
Australia Prime Minister Scott Morrison nih, “Liamcia kum tlawmpal thokin China he kan i pehtlaihnak a rawk tuk cang si kaw atu bantukin ramkhel lei in duhlonak kan langhtermi hi China cozah a lau tuk awk si lo,” tiah a chim.
“Australia rammi hrim nih China cungah hma lak an duhmi asi caah ka tuahmi asi. Tuah a haumi ka tuahmi asi.
“Australia ralkap thazaang ṭhawnter kan timhmi le naite ah nuclear seh bunhmi titanglawng (sub-marine) cawk kan timhmi zong China cozah nih thi dengin a kan doh peng,” ati.
China Ramdang Vuanci Zung biachimtu Wang Wenbin nih, “Australia cozah te hna cu Olympics puai ah ra ve dingin kan sawm zong asi lopi. Ramkhel lei miatnak kawl duh ah a hei awn sawhsawh ve i si. An rat zong rat lo zongah hohmanh an zei poi lai lo. Australia cozah rat lo nihhin China ah tuah ding Olympics hlawhtlinnak samfa tia hmanh a dawn lai lo,” tiah nehsawh taktak in a leh.
COVID-19 pulrai a linhsat lincang kum 2020 ahkhan Australia Prime Minister Scott Morrison nih, “COVID-19 a thawhkehnak hi hlathlainak tuah ding asi…,” a rak ti lengmang caah China cozah a thinhung tuk i Australia chuak tampi China kuat a phih caah Australia sipuaizi fak tukin a tla i minung tampi rian ngei loin an vai. Cucaah Australia mipi nih China cozah cu an huat ngai.
