Zarhpini zingka cu Virginia state ah khuadawm a chah tuk i lam cungah horha a tamtuk caah Interstate 64 highway ah motor 70 dengmang bak an i pah, tiah CNN nih a thanh.
Richmond khuapi nichuahlei in meng 50 a hlatnak ah accident a can hi a si i lam cung ah motor an khat dih.
York-Poquoson Sheriff’s Office le Virginia State Police nih accident ruangah motor an i thuat dihmi hmanthlak cu an Facebook ah an tar.
Accident ahhin motor 69 an i tel. Minung 51 an i hliam, tiah state palek nih an chim.
“Zinglei sml 7.51am ah Queens Creek Bridge hlei cungah khuadawm chahpi le tikhal an um. Zeiruang ahdah accident hi a chuah ti cu kan hngal lo nain khuadawm le tikhal ruangah si lai kan ti” tiah Virginia state palek Michelle Anaya nih a chim.
Aa hliammi pawl cu sizung ah an kalpi hna. Nunnak caah thinphang tiang in aa khawngmi cu an um lo i a tam deuh cu sizung an chuak cang hna.
