UPC Biakinn telh in Thantlang inn 19 an khangh than, inn 500 hrawng khangh cang

Nizaan December 4 ah uknak firtu Kawl Ralkap nih Thantlang khua inn 19 an duah khangh hrawh ṭhan.

Inn 19 an khangh hrawhmi lakah UPC biakinn le UPC zung zong an i tel. Biakinn Sang inn 2 le Market Sang inn 17 an khangh hna.

Inn 19 ngeitu hna min cu;

  1. Salai Van Za Ling (Biakinn Sang)
  2. Sayaci Tei Nawn (Biakinn Sang)
  3. Pu Van Dawt Thang (Market Sang)
  4. Pu Thla Hre (Market Sang)
  5. Pu Mawng Khin (Market Sang)
  6. Pu Thluang Thang (Market Sang)
  7. UPC Biakinn (Market Sang)
  8. UPC quarter (Market Sang)
  9. Pu Cung Dun (Market Sang)
  10. Pu Ngun Tha Cung (Market Sang)
  11. Pu V Sang Cung (Market Sang)
  12. Sayama Far Meng (Market Sang)
  13. Pu Siang Zel (Market Sang)
  14. Pu Biak Lian Cung (Market Sang)
  15. Pu Bawk Cung (Market Sang)
  16. Pu Mawng Cung (Marktet Sang)
  17. Pu Hlei Hmung (Market Sang)
  18. Pu Tum Lian (Market Sang) le
  19. Pu Uk Ling (Market Sang) hna an si.

Inn 500 hrawng an khangh cang

September 9 thokin uknak firtu Kawl Ralkap nih Thantlang inn an duah lengmang hna i nihin tiangah inn 492 an khangh cang.

September 18 ni 1 chung te ah hotel pakhat telh in inn 19 an khangh. October 29 ni khat te ah inn 164 an khangh. November 25 inn 29 tiang ni 5 chungah 220 an khangh.

  1. September 9 ah inn = 1
  2. September 18 ah inn = 19 
  3. October 29 ah inn = 164
  4. November 6 ah inn = 8 
  5. November 9 ah inn = 2 
  6. November 10 ah inn = 7 
  7. November 11 ah inn = 3
  8. November 24 ah inn = 49
  9. November 25 – 29 ah inn = 220
  10. December 4 ah inn = 19 tiin dihlak inn 492 an khangh cang.

September 9 in atutiang an khanghmi inn 492 chungah a tam deuh cu Bokyoke Lam ormi Thantlang mirum pawl inn ṭhaṭha le dawr khan pawl an si hna.

Phun dangin chim ahcun, Thantlang khua i minung tambiknak le Thantlang khua a sunlawi tertu le a dawhter tu inn vialte an khangh hrawh dih cang hna.

Thantlang khuami 10,000 hrawng cu nunnak kawl in September thla ah India ramri lei ah an zaam dih hna. Cheukhat cu India ramri khuate pawl ah an i dor hna. Tam deuh cu India ram ah an lut i Mizoram ralzaam camp ah an i dor hna.

Chin Ralzaam 70,000 leng an um cang

Thantlang peng Lungler khua zongah September 10 le 11 ah CNA/CDF le Kawl Ralkap i kahdohnak a chuak i Kawl Ralkap nih vanlawng in khua chung ah duhpaoh in bomb a thlak kah caah khuami le pawngkam khuate tampi cu ramtang le India ram, Mizoram state ah an zaam hna.

Atu hi Mizoram ah Chin ralzaam 35,000 in 40,000 kar an um lio asi, tiah Chin Nuhrin Covo Bu (CHRO) nih a thanh.

Mindat, Paletwa, Kanpetlet, Falam, Matupi, tbk peng dang pawl zongah kan miphun 40,000 hrawng nih nunnak kawl in an inn le khua an zaamtak i khuadang le ramtang ah harsa taktak in an um tuar lio asi.

February 1 ah Myanmar ralkap nih mipi cozah uknak a chuh thokin ramchung ramleng ah Chin ralzaam 70,000 leng an um cang, tiah CHRO nih a thanh.

Thantlang khuami 7 an thah hna, 20 hrawng hliam an tuar cang

Thantlang ah CDF le Kawl Ralkap i kahnak ral a chuah hnu in atutiang ah sualnak ngei lo khuami 7 leng an thi cang i tampi hliam an tuar cang.

August 25 zaanlei CDF le Kawl Ralkap an i kah lio ah Kawl Ralkap nih duhpaoh in khua chungah miakpi le meithal an kah caah inn tampi an khen hrawh i inn ah amah tein um komi sualnak ngei lo kum 10 ngakchia Van Bawi Thang an kah thah. Adang minung 9 an hliam hna.

August 27 ah Kawl Ralkap bomb nih a puah i Sianginn Sang ummi Pu Hlei Bik, kum 40 a nunnak liam. Minung 7 hliam an tuar. 2 cu an kut le ke bul lakin a puah hna.

August 28 ah kum 14 ngakchia Uk Lian Kam a nunnak liam. August 27 ah Kawl Ralkap bomb puakmi in hliam a tuar i a thaizing ah a nunnak liam.

September 15 ah Pu Van Za Ceu cu Kawl Ralkap nih an kah hrilh hnu ah an tlaih i a thawngpang theih asi ti lo. An thah, tiah zumh asi.

September 18 ah Kawl Ralkap nih Pastor Cung Biak Hum, kum 32 an kah thah.

September 29 ah Thantlang ah thil lak aa thawhmi Pu Ral Tu, kum 70 le Pu Hram Cung, kum 70 cu Kawl Ralkap nih an kah thah hna. An i citmi motor an kah i an thih hi si. Motor chungah minung 6 an um. Pu Zo Peng, kum 50 cu alu ah an khen ve nain a thi lo. Pu Than Heng, kum 78 cu a keng ah an hliam ve. Adang 2 cu hliam an tong lo.

November 13 le December 3 ah Thantlang ah a thli tein thil lak aa thawhmi kum 20 nu le kum 24 nu an kah hna i hliam an tuar. December 3 ah aa thawmi kum 24 nu cu a hma fah tuk caah a nunnak chanh thlop dingin CDF nih an chanh i India ramri lei ah an tlikpi.

Nawlpatnak: Kawl Ralkap ṭhat lonak hi mi tampi nih an hmuhnak hnga SHARE lengmang hna usih

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...