Home Chin UNHCR Malaysia Thawngthanh: Ram Thumnak Kalnak Kong

UNHCR Malaysia Thawngthanh: Ram Thumnak Kalnak Kong

Covid-19 karh khamnak caah khualtlawn telh in thil tampi khap an si caah Malaysia telh in vawlei pumpi ah ralzaam hna ram thumnak kalnak fak tukin a hnorsuan.

1. Malaysia cozah nih chawhvah a khap (MCO/lockdown) caah le ralzaam lawng si loin UNHCR rianṭuan pawl zong an zawtnak hnga lo, ram thumnak kalnak telh in UNHCR rianṭuannak tam deuh cu phone chung silole video call in a langpar in kan tuah dih hna.

2. COVID-19 nih ramdang khualtlawn fak tukin a phih caah Malaysia um telh in vawlei pumpi ah ralzaam pawl ram thumnak kal a phih dih hna.

3. Mah ruangah interview paoh cu a langpar in kan tuah ko hna nain, ram thumnak kal dingin mizei dah kan cohlan hna timi kha cu aa khat peng ko.

(a) Ram thumnak kal cu mi kip caah asi lo. UNHCR nih card/catlap kan in pek asilole ralzaam ah kan in cohlan thawngin ram thumnak ah na case kan in kuat piak lai tinak asi lo, ram thumnak na kal hrimhrim lai tinak asi lo.

(b) Ram thumnak kal cu a him lo tuk hringhranmi ralzaam hna ca lawngah asi. Aho case hi dah ram thumnak ah kan kuat piak lai (aho hi dah ram thumnak kan kalter lai) timi cu pakhat cio nan dirhmun kha zoh asi peng rih ko lai.

(c) Hi nu/pa hi zei tluk in dah bawmh a herh, atu a umnak ram ahhin zei dirhmun dah asi, ram thumnak nih hika ram ummi ralzaam lak an timhmi ahhin kan tenh kho lai maw, ti bantuk thil tampi kan zoh hmasa dih hnu ah ram thumnak kal dingin na case kuat piak/lo bia kan chah.

4. Na case cu ram thumnak kuat piak dingin kan thim chung ahcun, kuat piak awk a ṭhat tak/lo thil sining tling deuh hal chap dingin DSU (hmasa ah RST tiin auhmi) nih phone chawnh in an in hal lai.

Ram Thumnak Kalnak Interview

Na case cu ram thumnak kuat piak awk aa tlak ko kan ti ahcun, a langpar in biahal (interview tuah) dingin kan in chawnh lai. Interview cu phone chung asilole online in kan tuah lai. UNHCR zung hrimhrim ah rat a haumi na si i COVID-19 zulhphung zong nih an onh ahcun phun dang si hnga.

Phone chung asilole online in interview tuah na duh maw tiin DSU zung nih an in chawnh tikah, a langpar interview tuah na duh lo ahcun na chimh hna lai. Mah ruangah ram thumnak ah na case kuatpiak dingin kan thim chungmi kha a hnorsuang lai lo. Sinain, UNHCR zungah hmaitonh interview tuah cu UNHCR zung on tik lawngah a ngah te lai caah na case ram thumnak kuat piak kha a rau deuh ve lai.

A langpar in ram thumnak kalnak interview kan in tuah tikah, UNHCR rianṭuan nih an chawnhnak aruang le ram thumnak kal dingin timhtuah piak ning a tawifiannak cu an chimh ko lai. Cun, na chimmi a himnak hnga, midang nih na chimmi an theih lonak ding hmun/khaan ah um dingin an chimh hmasa fawn ko lai. Na konglam catlap/certificate ti bantuk UNHCR sinah kuat a hauh ahcun kuat ning zong an chimh lai.

Zaangfahnak tein, a langpar in ram thumnak kalnak interview kan in tuahmi kha na aw siseh video siseh record tuah hin hlah. Record na tuah ahcun UNHCR biathli na phuan asi lai caah fak piin hma kan lak lai.

UNHCR nih Ram Thumnak Kalnak Interview Kan In Tuah Hnu Ah

Ram thumnak kalnak interview kan in tuah hnu ah, na case cu ṭha tein kan zoh ṭhan lai i ram thumnak ah kuat piak awk a tlak/lo bia kan chah te lai.

Ram thumnak kalnak interview kan in tuah hnu ah, na chungkhar minung benh asilole na dirhmun ai thlengmi a um i UNHCR sinah thawnthanh na duh ahcun, mlsludsu@unhcr.org ah email in kan kua te.

Na case cu ram thumnak ah kan in kuat piak ahcun, DSU zung asilole kan in kuatpiaknak ram nih na case kong an in chawnh thawngthanh te lai.

Ram thumnak nih an ram ah lak dingin an in cohlan/lo cu an phungphai le upadi ningin anmah nih a hmanungbik (donghnakbik) bia an chahte lai.

Ram thumnak kalnak interview kan in tuah in thla 6 hnu tiangah an in chawnh thawngthanh lo ahcun, zaangfah tein mlsludsu@unhcr.org ah email kan kua. Email a kan kuami an tam tuk caah, nan dihlak kan in let kho hna lo. Thil pakhat kong kha voi tamtuk email kan kua hin hlah. Na rauh chinchinnak asi lai.

Na case cu US asilole Canada ah kan in kuat piak ahcun

US ah na case kan in kuat piak ahcun, na case kong thawngpang hal na duh ah siseh, na case he ai pehtlaimi paoh kha US kalnak ṭuanvo latu Resettlement Support Center (RSC) email KL.Inquiries@rescue.org ah email na kuat hna lai asilole an phone numbere +6 03 2141 5846 ah na chawnh hna lai.

Canada ah na case kan in kuat piak ahcun, Immigration, Refugees and Citizenship Canada’s web form ahhin na case kong thawngpang thar zoh khawh asi.

Ram thumnak kal lai timhtuahnak le kalnak

Ram tampi nih pulrai ruangah an rammi asi lomi cu khualtlawn an phih peng rih hna. Mah pinah, kan ram ah COVID-19 a kan phurh sual lai ti an phan caah ahlei in ngandamnak an check ter hna. Cohlanmi ralzaam tlawmte cu ram thumnak an kal kho ko nain, vawlei pumpi ah vanlawng zuan caan an thawn/tlai lengmang. Ralzaam a lami ram pawl nih cun ralzaam lak an i zuam peng ko, cun pulrai daih lei a panh cun ramdang khualtlawn zong duhsah tein aa ong deuhte ko lai tiah kan i ruahchan.

Ralzaam pawl ram thumnak kal a bawmtu IOM nih vanlawng citnak caah a herhmi pawl cu an in timhtuah piak lai. Ngandamnak check zong anmah nih an in tawlrel lai. Ram thumnak nih lak dingin an in cohlan ahcun, IOM nih vanlawng citnak caah a hermi vialte an tuahpiak khawh cangka in an in chawnh lai. An in chawnh lo ahcun IOM phone number +603 923 5540 ah na chawnh khawh hna pinah iomklinq@iom.int ah email na kuat khawh hna.


Na phone number silole address nai thlen ahcun zaangfah tein UNHCR sinah thawng kan thanh

Na phone number silole umnak address nai thlen ahcun UNHCR sinah thawngthanh philh hin sawh hlah. Mah lawngah, a herh tikah UNHCR nih kan in chawnh khawh lai i na case i tap lo tein a kal kho lo.

Abiapitukmi: UNHCR nih tuahpiakmi paoh cu manlo lawngte an si

Ram thumnak kalnak telh in, UNHCR silole UNHCR he aa bawmmi bu pawl nih ralzaam caah kan tuahmi pawl hi mi pakhatkhat silole bu pakhatkhat nih tangka cu zat ka pe law kan tuahpiak lai an ti ahcun zum bak hlah. Tangka na ka pek cun silole na ka ihpi cun UNHCR nih an tuahmi cucu/khakha kan tuahpiak lai an in ti ahcun, a rannak in UNHCR sinah report colh hna.

UNHCR Kuala Lumpur: mlslufrd@unhcr.org
Inspector General’s Office (IGO) : inspecgtor@unhcr.org ah email kan kua. Asilole UNHCR Zung i Gate B ah ummi RED MAILBOX ahkhan thil sining ca sanh.

Report mi paoh cu a report tu kongkau zeihmanh kan phuang lai lo. Mah zong hi hmeh in online ah thil diklo (mihlen le eihmuar) kong kuat khawh kan si.

Nawlpatnak: The Chin Express nawl peknak tel loin website ah kan copy/paste piak hlah uh, tiah kan in nawl hna.

Exit mobile version