15.3 C
Hakha
Thursday, September 23, 2021
- Advertisement -

Ṭial Tharmi

UNHCR Malaysia: Selangor state cozah nih ralzaam le ramdangmi vialte an sang cio ah COVID-19 raikhamsi a chunh hna lai

Tuni ah UNHCR Malaysia nih ralzaam bu hruaitu pawl thawng a thanh hna.

“Selangor state cozah nih ralzaam le ramdangmi (UNHCR card ngei he ngei lo he) an sang cio ah COVID-19 raikhamsi va chunh dih kan duh hna caah kan bawm tiin UNHCR a kan pehtlaih.

“Cucaah, ralzaam bu hruaitu pawl nih zaangfahnak tein Selangor state chung i;

  • Nan member milu zat (ruahdamh)
  • Nan member an umnak sang pawl le kha sang an kal tikah pehtlaih dingmi upa min le phone number le
  • Nan member chungah raikhamsi aa chun cangmi milu zat (ruahdamh) UNHCR sinah kan kua uh,” ati hna.

Ralzaam bu hruaitu pawl nih Selangor state chung an member milu zat le an umnak sang pawl cu UNHCR sinah an kuat hnu ah UNHCR le Selangor state cozah nih ralzaam umnak sang kip ah kal in raikhamsi an chunh hna lai.

Atu hi cu Selangor state chung lawng asi rih. Selangor state cozah nih a state chungum ralzaam le ramdangmi paoh chunh a timhmi hna asi. State dang kong cu thawngpang um rih lo.

Zei bantuk raikhamsi dah an chunh hna lai?

UNHCR nih tuni thawngthanhnak ahcun a chim lo. Hmasa ahkhan Raikhamsi Chunhnak Vuanci Pu Khairy nih, “Ralzaam pawl cu cozah nih ton an har tuk caah voi 1 lawng chunh haumi China ser CanSino kan chunhte hna lai,” a rak ti.

Sinain, atutiang ahcun Malaysia cozah nih ralzaam te lawngin raikhamsi chunhnak a tuah rih lo.

Ralzaam le ramdangmi nih kanmah tein cozah app MySejahtera ah kan sok i an rammi he aa khat tein a ummi paoh a kan chunh. US ser Pfizer chunhmi zong an um pah, voi 2 chunh haumi China ser Sinovac chunhmi kan tam cem men lai (an rammi zong an chunh ciomi hna si ko). UK ser AstraZeneca chunhmi zong an um pah.

Malaysia cozah nih ralzaam le phungninglo ramdangmi a kan rem lonak a chim lengmang ko nain, COVID-19 raikhamsi hi kan rammi lawng kan chunh hna ahcun ralzaam le ramdangmi sin in zawtnak a karh ṭhan peng lai ti a phan caah a kan chunh ve nak asi.

Chinmi cu chunh awk an um tuk ti lo

Selangor state um Chinmi cu voi 1 tal cu kan i chun pah dih cang hna. Aa chun rih lomi cu damlo ruangah le anmah nih an duh rih lo ruang deuh ah asi.

Chunh a duh ko nain aa chun rih lomi cu an um huaha ti lo, an um lo ti khawh asi. Appointment ngah rih lomi pawl zong Serdang Sizung le Bukit Jalil Stadium ah appointment loin an kal i an i chun thluahmah hna.

KL le Selangor ummi paoh cu August 22 tiang Bukit Jalil Stadium ah appointment hau loin chunh khawh peng asi rih. LRT tlanglawng in Bukit Jalil Station ah ṭum asi. Taxi hauh lo caah ai rem ngai. Aa chun rih lomi nan um ahcun vai chun cio uh. UNHCR card ngei he ngei lo he chunh khawh dih asi, nain UNHCR card na ngeih lo ahcun na CRC, FRO, ACR, passport, tbk na ngeihmi paoh nai ken ai.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -