UNHCR Malaysia Nih Chin Ralzaam A Lehmi Hna

UNHCR Malaysia Nih Chin Ralzaam A Lehmi Hna
  • Chin upa pawl nih “nan sining dikthlir cathluan” rak ap colh uh
  • 2020 Myanmar Thimnak a dih tiang sauhpiak/lo cu nan cathluan zoh in kan ceih lai
  • Ram thumnak a phan Chinmi pawl kha bawmh hal hna ulaw an cozah kha nawl hna seh
  • Australia le US Tanzung zongah ca kua hna uh
  • Australia le US Tanzung ah Humanitarian Visa nan sok kho peng rih ko

UNHCR Malaysia Lutlai Richard Towle – June 29 ah UNHCR zung hmai ah Chin ralzaam pawl nih buainak tel lo dai tein nan ngaihchiatnak nan rung langhter tikah, ngakchia tete, siangngakchia pawl le nulepa zong tampi ka hmuh hna i ka lung ttha hrim lo. Atu lio ah Chin ralzaam pawl zeitluk in dah nan ngaihchiat lai tiin kan tuarpi ngai hna. Keimah telh in UNHCR rianttuan dihlak kan ngaihchia cio. Zeidah ka tuah lai, zeitin dah ka um lai tiin hmailei kong nan ruah tikah nan ngaihchia tuk lai ti ka zumh.

“Chin ralzaam kongah biachahmi le an caah thim awk 2” tiin cathluan kan chuahmi kha UNHCR Malaysia lawng nih bia kan khiahmi a si lo. Ralzaam a latu ram US, Australia le ramchung ramleng NGO pawl le UNHCR Malaysia nih dothlatnak kan tuahmi vialte fonh hnu ah bia khiahmi a si. Geneva UNHCR Headquarters nih biachahnak a tuahmi a si. UNHCR Malaysia nih Chinmi nan caah thawngpang chia kan in thanh hna tikah kanmah zong kan lungttha hin lo.

Chin hruaitu pawl nih tuni ah nan rak i putmi lungtlinlonak cathluan zong ka kut ah a phan cang. Ca chungah nan ttialmi hi an ttha ngai. Cheukhat cu keimah Malaysia ka phak hnu in Chin ralzaam caah ka si khawh chungin kan tuahpiakmi hna kong pawl a si.

UNHCR Malaysia rianttuan pawl nih Chin ralzaam pawl usa pek in kan in bawmh hna hi kum 13 chung a si cang. Chin ralzaam 80,000 leng zong ram thumnak kan kalter cang hna. Chin ralzaam hi 100% dengin kan in zohkhenh ko hna. Keimah mark laknak caah ka chim bia si lo. Kan rian khi a si ko. Chin Ralzaam Bu pawl zong kan si khawh chungin kan in bawmh hna. Cucaah, atu bantukin nihin ah sandah nan piah hnawhchan le nan hal duhmi pawl hi fiang tein hngalh ka duh ko.

Halmi 1nk – Chin upa pawl (ICC leaders)

2019 December 31 tiang (thla 18) lawng caan na kan pekmi hi Chin ralzaam caah a tlawm tuk, Myanmar ram hi zumh thlu awk a ttha rih lo i ramkhel sining zong hi a dai taktak rih lo, a si khawh ahcun 2020 Myanmar Thimnak a dih tiang caan kan sauhpiak, tiah Chin hruaitu pawl nih an hal.

Lehmi 1nk – UNHCR Lutlai

Nan halmi hi sullam a ngei ngaingai. UNHCR nih Chinmi kong cathluan kan chuahmi kha zohfel tthan a herh, Chin Ralzaam Bu pawl zong nih “nan sining dikthlir cathluan” rak ap ve uh. Mah cathluan cu zoh in ttha tein khua kan khan tthan lai. Kan tuah hrim lai tiah bia kan kamh kho hna lo nain tuah khawh a si ko.

A rannak in cathluan nan rak ap a hau lai. Cun, Malaysia cozah hrimhrim nih UNHCR nih minung tampi card nan pek hna i nan zohkhenh fawn ttung lomi hi ngol cang uh a kan ti peng. 2014 thokin khan UNHCR zung hi kan in kharpiak hna lai a kan ti lengmang. UNHCR minung an karh pengmi hi a si khawhning paoh in donghter uh a kan ti peng. Mah ruang ahcun Chin ralzaam pawl nih nan tuarnak hi a si. Malaysia cozah nih, Myanmar ralzaam pawl hi bawm ti hna hlah uh, ralzaam an si lo a kan ti hi avoi a tam tuk hringhran.

Chin ralzaam pawl caah Malaysia ram hi a biapi tuk ti kan hngalh ko. Cucaah, Malaysia cozah cu kan si khawh chungin kan nawl lengmang. Atu zong kan in nawlpiak rih ko hna lai.

Cucaah, UNHCR le Chin Ralzaam Bu upa pawl hi thla fatin meeting tuah lengmang in thil sining a dikthlir in i ceih tti dingin khua kan khan lai.

Halmi 2nk

Ram thumnak kal dingin min cazin pek cangmi Chin ralzaam pawl hi a si khawh chungin ram thumnak phanhter hna uh.

Lehnak 2nk

Chin ralzaam pawl usa pek in kan bawmh hna hi Malaysia ka phanhka khan a si cang. Kum 2013 ah UN card kan in pek hna lio te khan Malaysia cozah nih a kan thloh len cang. Kha zatzat minung UN card pek ding kha Malaysia cozah nih voi tamtuk a kan khenkham. Chinmi usa kan pek hna hi atu ahcun kum 5 a si cang ti ko ning.

2013 ahkhan Chinmi 23,000 bak UN card kan in pek hna.

Ram thumnak kal kong he pehtlai in, kum 2014 ah min aa khatmi (fraud case) kong a hung  um. 6,000 hrawng bak hrokhrawl case (fraud case) nan um. Mah ruang ahcun US nih UNHCR rianttuannak kha a ningpi in a zumh ti lonak kong fak taktak in a kan sik. Australia zong nih, UNHCR nih felfai tein UN card nan pe hna lo tiin a kan sik ve. Phun dangin chim ahcun, mah ram pawl hrim nihhin ralzaam lak kha anmah tein an i sum cang.

Mah lio i Chin hruaitu pawl le UNHCR santlaih lo ruangah vawlei pumpi theih in kan mualpho. Atu zong US nih zeizat dah an lak hna lai ti ka chim kho lo. US nih Chin ralzaam 5,000 ka lak hna lai a ti ahcun kuat dingin ready kan si ko.

Cucaah, ram thumnak a phan cangmi Chin upa pawl kha bawmh hal hna ulaw, an cozah le ralzaam bawmtu sinah ttha tein voi tampi an nawl hna ahcun thil tampi aa thleng khomi si.

Ram thumnak kal dingin min cazin pek cangmi pawl cu kalter hrimhrim dingin kan i zuam ko lai.

Halmi 3nk

UNHCR nih Chinmi kongah biachahnak nan tuahmi hi ramdang cozah sinah thawng nan thanh maw?

Lehmi 3nk

Si, ralzaam a latu ram vialte (US, Australia, Canada, Japan) ti bantuk cozah vialte sinah thawng kan thanh dih. Asinain, Australia le US Humanitarian Visa pawl kha cu an Tanzung sinin nan sok khawh peng ko lai. Nain, interview an phit tikah an chimmi hoih in cohlan/lo cu an khiahte lai.

Halmi 4nk

Ralzaam ah cohlan cangmi (RSD Interview a awng cangmi) pawl hi anmah lungtho tein tlun duh hna sehlaw an caah thim awk 3nk ti phun in na tuah piak kho hna lai maw?

Lehmi 4nk

Si, a si kho ko men lai. Mah kong hi Durable Solution (DS) Zung nih a tlaihmi si. DS (RST) Zung lutlai Richael zong mah kongah atu hi Geneva ah meeting a kai lio si. A rung kir tikah nanmah he i tong tthan hna usih law ceih usih law a ttha cem lai. Tuah khawh a si ko lai.

UNHCR le Chin Upa i bawm in ttuah tti ding hnatlakmi pawl

  1. Chin upa nih a rannak in UNHCR ah “nan sining dikthlir cathluan” pek ding
  2. UNHCR le Chin upa pawl thla fatin meeting tuah ding
  3. Ram thumnak kal dingin min cazin pek cangmi Chin ralzaam pawl kalter dingin i zuam ding
  4. Chin upa pawl nih an chimmi pawl zoh in Chin ralzaam kong ceih tthan ding

Kap 2 ruahnak i cheuhmi pawl

Chin upa (ICC) pawl nih ruahnak cheuhmi hna;

  1. Chin ralzaam pawl hitin hlawt loin Myanmar cozah kan tonpiak
  2. Kirnak caah zeihmanh Myanmar rammi sinak tehte a ngei lomi pawl khuakhan piak hna
  3. Chungkhar milu a tammi pawl usa pek in khuakhan piak hna
  4. Malaysia cozah le Chin ralzaam pawl pehtlaihnak kan tuahpiak
  5. Chin Ralzaam Bu zung pawl a dir khawh rihnak hnga a herhmi kan bawm rih

UNHCR lei nih ruahnak cheuhmi;

  1. UNHCR Malaysia hi sual phawt loin rianttuan tti usih
  2. Kap 2 i bawm in kan tuah khawhmi paoh tuah tti usih
  3. Chin Ralzaam Bu pawl zong nih US, Australia, tbk. Tanzung pawl hi ca kua hna uh
  4. Chin Ralzaam Bu nih nan zohkhenhmi hna hi ralzaam an si/lo chek uh
  5. Atu thokin cun UNHCR nih ralzaam a si taktakmi lawng a zohkhenh cang hna lai. Cucaah, Chin Ralzaam Bu pawl zong nih UNHCR a kal ningin asiloah nan minung hna kha ralzaam an si/lo thleidang hna ulaw an hmailei caah biakhiahpiak hna uh

Chin hruaitu [ACR, CRC, FRO, DAI, ZAM = ICC] nan dihlak cungah kan i lawm tuk. Pathian nih in umpi hna sehlaw Chin miphun caah nan saduhthah tlinter ko seh.

Chin Ralzaam 500 Leng Nih UNHCR Zung Ah Lungtlinlonak Langhter – ka HMET law rel ve

Be the first to comment

Leave a Reply

Your email address will not be published.


*