UNHCR Malaysia lutlai Mr. Thomas nih, “2018 le 2019 ah UN card/catlap chuhmi pawl cu an case kan zohpiak ṭhan hna lio asi,” tiah a chim.
Malaysia Chin ralzaam bu dihlak fonh ICC le Malaysia NGO nih, “Chin ralzaam card/catlap na chuhmi vialte hi atu lio Myanmar ram, ahlei in Chin state buainak lakah kir awk an ṭha lo. Malaysia ah le UN card lo cun tlaih an tong peng fawn. Cucaah card pe ṭhan hna…,” tiin UNHCR an hal caah atu bantukin Mr. Thomas nih cakuat in a leh hna hi si.
Mr. Thomas nih, “Atu lio Myanmar thil cangmi kongah ka lungṭha lo tuk hringhran. Malaysia le innpa ram pawl cu Myanmar ralzaam pawl nan ram ah luhter hna ulaw, an ram ah khirh hna hlah uh tiin kan forhfial cuahmah ko hna,” tiah a chim.
“Atu lio cu COVID-19 ruangah Malaysia cozah nawl chuahmi zulh in rianṭuan asi i UNHCR zong lungduh in kan cawlcang kho lo.
“UN card/catlap chuh cangmi kong hi hmasa ka rak chim cang bangin, ralzaam a sokmi paoh cu UNHCR phungphai ning tein Ralzaam ah Cohlan/lo Biakhiahnak (RSD) interview kan phit ter hna i Myanmar an zaam taknak aruang an chimmi (an case) pawl hi ralzaam ah cohlan awktlak an si lo caah chuhmi an si.
“Atu hi, pakhat tete in an case zohpiak ṭhan hna dingin rianṭuan kan thok cang,” ati.
The Chin Express nih Mr. Thomas bia zohfelnak/analysis
Kan theih cio bangin, UN le UNHCR hruaitu pawl nih bia ṭha an chimmi paoh hi asi thlu tawn lo. Cucaah an bia ning piin i lak loin ngaihpiak zia thiam an hau.
Mr. Thomas nih, “Malaysia le innpa ram pawl cu nan ram ah a hung zaammi Myanmar ralzaam luhnak nawl pe hna ulaw khirh hna hlah uh tiin kan forhfial hna…” ati.
Sinain, atu hin Kawlram in Malaysia ra ulaw Malaysia cozah nih an hmuh hna ahcun an tlaih thongthlak viar ko hna lai. Rat a ngah tinak asi lo.
Cun, “UN card/catlap chuh cangmi pawl cu pakhat tete in an case zohpiak ṭhan kan thok cang…,” ati.
Hihi chuh cangmi paoh card/catlap kan pek ṭhan dih hna lai tinak asi rih lo. Pakhat cio nan case cungah biachahnak tuahte ding asi — nain zoh hrim zohpiak duh ti lo nakin cun zohpiak ṭhan cu hnabeisei deuh ko.
