UNHCR catlap kha card in thlenpiak dingin kan i zuam, MyRC card sok hlah uh

UNHCR catlap hi card in thlenpiak dingin kan i zuam lio, MyRC card sok hlah uh

Malaysia Chin ralzaam bu 5 komh Independent Chin Communities (ICC) nih “MyRC card kong he pehtlai in UNHCR lei dirkamhnak le MyRC card aa tlaihmi mipi caah UNHCR he pehtlai in tthatlonak a chuahter maw?” tiah UNHCR sinah a hal.

Malaysia UNHCR lutlai Mr. Thomas: Keimah nih cun kan hrilhfianh kho hna lai lo. A ruang cu, aho hmanh nih MyRC card i tlaih a tthatnak an ka chim khawh rih lo caah a si.

ICC: Nain, MyRC cu 2017 ahkhan pei UNHCR nih ralzaam sinah theihternak na tuah kha.

Mr. Thomas: A fiangmi cu mah card hi cu UNHCR card a si lo. Cozah rianttuan lutlai an i tel an ti ko nain ralzaam tangka liamter cu ka cohlang lo.

A ruang cu UNHCR bawmhnak cu free a si. Pahnihnak ah UNHCR card tluk in santlaihnak a ngeih lo ahcun zeidah sok cu a hau. Cun mah hi cozah tuahmi programme zong si lo. Mibu pakhat nih sipuazi caah tuahmi a si caah UNHCR he pehtlaihnak a ngei lo.

MyRC card

ICC: Nain, mi cheukhat cu MyRC card in tlaihkhih an luat ko.

Mr. Thomas: Si, cheukhat thil hi a buaithlak ngai. Zei bantuk card i tlaih zong ah tlaihkhih a luatmi an um ko. Nain, UNHCR cu palek pawl he voi tampi meeting kan tuah cang. Kedah state tiang zong kan kal i palek bawi pawl kan ton hna. UNHCR card aa tlaihmi cu tlaih ti lo ding in kan hal hna.

ICC: Thonginn le camp chung um Chin ralzaam pawl UNHCR card kan pekpiak hna.

Mr. Thomas: Cheukhat camp le thonginn cu an hung ttha thluahmah cang. Nain, tuan i ka chim cang bantuk khan lahwahkah rianttuan le palek nih Rohingya silomi cu an thlah duh hna lo. Kanmah lei nih thleidan lo dingin kan chimh lengmang ko hna.

Cheukhat camp le thonginn nih cun tlaihmi an um tikah interview tuah dingin UNHCR sinah thawng an kan thanh. An hung ttha deuh ngai cang.

Keimah zong nih ralzaam hna hi card i tlaih dih hna seh ti ka duh. Zei miphun ti um loin ralzaam paohpaoh card pek dingin kan i zuam liopi a si.

Cu ruangah, atu lawlawse cu UNHCR catlap kong hi palek kan fianh lengmang hna. Catlap tlaih a harnak zong ka theihthiam ko. Mah ruang cun, catlap in card ah thlenpiak dingin kan i zuam hi a si. Chin ralzaam pawl zong lungsau dingin va chim hna uh.

UNHCR nih mithar lak a timh – hmet law rel khawh si

Malaysia UNHCR nih tlaihkhih kongah a chimmi

UNHCR nih 2013 card chuh tongmi kong a chimmi