UN: Tu kum chungah Myanmar rammi 3.4 million rawl ei awk an ngei lai lo

- Advertisement -

“Tu kum chungah Myanmar rammi 3.4 million hrawng rawl ei awk an ngei lo kho,” tiah United Nations (UN) nih rawl ei awk ngei lo bawmhnak caah a dirhmi World Food Program (WFP) nih a thanh.

Atu hi Myanmar ram cu rawl man tamtuk a kai cang i sifak caah cun a har chin lengmang cang. Thil chuahnak sehzung, dawr, construction, services, tbk pawl zong sipuaizi an tuah kho huaha ti hna lo. Minung million tampi rian ngei lo, tangka lut ngei loin an um cang hna. Bank zongah tangka chuah khawh asi ti lo.

Myanmar um ramdang company pawl nih rianṭuan an ngol thluahmah caah minung tampi rian/tangka ngei loin an um.

WFP nih, “Myanmar ram ah rawl cawk awk a tlawm chin thluahmah cang, rawl man zong a kai thluahmah, rian ngeilo an karh thluahmah i rawl cawknak ngei lo an karh thluahmah.

“COVID-19 pulrai nih an ram sipuaizi fak tukin a hrawh fawn cang caah sifak santlai lo tampi rawl an har thluahmah cang.

“Rawl a tlawm chin lengmang i ei awk ngei lo ding an tam tuk caah ramkip nih zuanhnawh cio an hau,” ati.

Myanmar Chawlehnak Bu zong nih, “Ralkap nih uknak a fir hnu in thil ṭhitnak rianṭuan minung ting 2 leng rian/tangka an ngei ti lo,” tiah a thanh ve.

Ralkap nih uknak a fir hnu in, ramdang company tumtlang: Benetton, H&, tbk pawl nih Myanmar ah thil ṭhit an ngol.

Mah pinah, construction rianṭuan ting 4 hrawng rian an ngei ve ti lo, tiah Myanmar Chawlehnak Bu nih a thanh.

Yangon inn le lamsul sak liomi vialte an ngol dih cang. South Korea bawmhnak in sakmi Sethmuh Sang, Japan bawmhnak in sakmi Yangon-Thanlyin Hlei, Thilawa Special Sipuaizi Sang, tbk vialte zong an ngol dih.

WPF nih, “Myanmar ungti sipuaizi zong February thla thokin 20% a tla cang. Yangon le Mandalay ramṭhen ah rawl man 4% a kai cang.

“Myanmar rampumpi ah buaitlak in rawl man 3% a kai cang.

“Kachin state i KIA le ralkap an i kahnak hmun Bhamo le Putao peng lebang cu rawl man vantawng bakah a kai, 35% a kai cang,” ati.

Bank rian an ṭuan khawh ti lo caah lungduh in tangka chuah khawh asi ti lo i tangka chuah awk zong tampi a um ti lo caah rawl man a kai chin lengmang lai, ati.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...

US le NATO nih Ukraine sinah ral tuknak vanlawng kuat an timh

US le NATO nih Ukraine sinah ral tuknak vanlawng kuat dingin khua an khan liopi asi.US Ramdang Vuanci...