Uknak chuttu Myanmar ralkap bawizik Min Aung Hlaing nih uknak a chuhmi Pi Aung San Suu Kyi le President Win Myint thong a thlakmi hna kong he pehtlai in UN Security Council nih tuni ah cathanh a chuah.
“Rampi Ruahnak Petu Aung San Suu Kyi le President Win Myint le adang pawl thong an thlakmi hna cu UN Security Council kan lungṭha lo tuk hringhran.
“Liamcia cathanh pawl zongah kan chim lengmang cang bangin, February 1 thokin nan tlaihmi vialte thlah dih hna uh, tiah kan nolh ṭhan.
“Myanmar ram democracy ngahter ding hi UN Security Council chungtel ram vialte nih tha kan pek pengmi asi.
“Democracy phungphai zulh, buainak i sum, kap 2 biaruahnak tuah le Myanmar mipi duhning in rualremnak tuah a biapi tuk.
“Cun, nuhrin covo tling tein upat le upadi ning tein rianṭuan a biapi tuk,” ati.
Min Aung Hlaing ukmi biaceihzung nih December 6 zingka ah Pi Aung Sang Suu Kyi le President Win Myint cu kum 4 veve thong a thlak hna.
Zaan nazi 8 ah ralkap ukmi Myawady TV nih, “Ram hruaitu Min Aung Hlaing nih Suu Kyi le Win Myint kum 4 thongthlakmi cu kum 2 veve ah a thumhpiak hna…,” tiin thawng a thanh.
