UN Security Council nih Myanmar ralkap cu ‘mipi fahnak pek i sum’ ati

Myanmar ralkap nih sandahpiahtu mipi a tukvelh, tlaih, hliam le thahmi hna cu nizaan March 10 ah UN Security Council nih a mawhchiat i “mipi fahnak pek i sum” ati.

Nain, Myanmar mipi thih zong a zei poi lomi China le Russia ruangah ‘Myanmar ralkap nih uknak a firmi cu UN Security Council nih a mawhchiat kho lo i fak deuh in hma kan lak lai ti zongin a tlerh kho lo’.

UN Security Council (UNSC) cu;

  • UN phunghram zong a thlengremh khotu,
  • UN General Assembly ah ramdang luh/lo nak nawl a ngeitu le
  • Ramdang zong raltuknak nawl a ngeimi (UN ralkap = US ralkap, Australia ralkap, tbk. pawl thlah in Myanmar ralkap tuknak nawl a ngeitu), vawlei daihnak le himnak ṭuanvo latu, vawlei cung bu vialte lakah nawl sangbik a ngeitu asi. A tawifiannak in chim cun, “UNSC cu vawleipumpi uktu” asi.

UNSC ahhin member ram 15 an um. Mak chungah ram 5; China, Russia, US, UK le France hi zungzal member an si caah biachahmi leetnak nawl (veto power) an ngei. Cucaah anmah ram 5 lakah pakhatkhat a lungtlin lo ahcun UNSC nih zeihmanh a tuah kho lo. Atu lawng si loin liamcia caan vialte zongah China le Russia nih Myanmar ralkap cu UNSC kut in an humzual peng — China le Russia hi Myanmar mipi caah ralnganbik an si ko rua.

UN Security Council nih, “Nu, mino le ngakchia telh in buai lo tein sandahpiahtu pawl fahnak na pekmi hna hi kan duhlo tiah fak piin kan langhter,” tiin cathanh a chuah.

“Ralkap nih asi khawh chungin mipi fahnak pek i sum tiah UN Security Council nih kan in fial, cun thil sining hi naih tein kan zoh peng ti zong kan in theihter,” ati.

Sinain, UK nih biatung a dirhmi “uknak na chuhmi hi kan cohlang lo” timi le “na cungah hma kan lak rihte lai” timi cu China, Russia, India le Vietnam nih an duh lo caah cathanh ah an telh lo.

UK cu tu thla UNSC President asi caah meeting ah ceih ding biatung (agenda) chuahpi tu asi. UNSC president rian cu thla 1 dan in member ram 15 nih an tlaih cio. A-Z tiang an ram min aa thoknak cafang a changchang in an i chaang hna. 2021 August thla UNSC president cu India asi lai.

UN lutlai Secretary-General Pu Antonio Guterres nih, “Thongtla vialte thlah dih ‘hrimhrim’ an hau ti hi UNSC cathanh nih Myanmar ralkap a lungfim ter sehlaw November thimnak phichuak kha cohlang seh ti ka duh,” tiah a chim.

UNSC cathanh chungah, “Ngandamnak lei rianṭuan, zatlang bu, rianṭuan bu, thawngla le ngandamnak lei rianṭuan pawl na khammi hna zong kan lungṭha lo tuk” ti le “Aruang um loin na tlaihmi vialte a rannak in thlah dih hna” ti zong aa tel.

UNSC cathanh kongah an lungput hal dingin Ralkap cozah cu media nih phone an chawnh nain a let duh hna lo.

February 1 ah ralkap nih uknak a fir hnu in atutiang ah sandahpiahtu mipi 60 leng a thah cang hna i 1,800 leng a tlaih cang hna. Mi tampi hmailei ruahchannak ngei lo tiangin a kah hliam hna.

Tlaihmi lakah mipi thawngthanhtu thawngla 24 leng an i tel.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...